សេ១២៥ បុកម៉ូតូស្ទេប ម្ចាស់ទាំងសងខាង រងរបួសស្រាល តែម៉ូតូខូចខាតយ៉ាងដំណំ

ភ្នំពេញ៖  ម៉ូតូពីរគ្រឿង មួយគ្រឿងម៉ាក ហុងដាសេ១២៥ និងមួយគ្រឿងទៀតម៉ាក ស្ទេប ត្រូវអ្នកបើកបរ បើកបុកគ្នាយ៉ាងពេញ ទំហឹងនៅចំណុច ផ្លូវចំការដូង ច្រកចូលខាងមុខសាកលវិទ្យាល័យភូមិន្ទកសិកម្ម ចំការដូង ក្នុងភូមិខ្វា សង្កាត់ដង្កោ ខណ្ឌដង្កោ កាលពីវេលាម៉ោង ១៦ និង៣០នាទី ថៃ្ងទី ១៤ ខែសីហា ឆ្នាំ ២០១៣។

តាមប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតហេតុ ម៉ូតូហុងដាសេ១២៥មួយគ្រឿង ពណ៌ខ្មៅ ពាក់ស្លាកលេខភ្នំពេញ 1AV-1616 ធ្វើដំណើរតាមបណ្តោយ ផ្លូវចំការដូង ក្នុងទិសដៅពីកើតទៅលិច ខណៈមកដល់ចំណុច កើតហេតុខាងលើ ក៏ជ្រុលបុកគ្នជាមួយម៉ូតូស្ទេប ពណ៌ស ពាក់ស្លាកលេខភ្នំពេញ 1AF-1692 បណ្តាយឲ្យម្ចាស់ម៉ូតូទាំងសងខាងរងរបួសស្រាល ដោយសារតែបានពាក់មួកការពារសុវត្ថិភាព ទើបមិនបណ្តាលឲ្យរងរបួសធ្ងន់ ។

សមត្ថកិច្ចនគរបាលចរាចរខណ្ឌដង្កោ ដែលចុះទៅវាស់វែងដល់កន្លែងកើតហេតុបានឲ្យដឹងថា  អ្នកបើកបរម៉ូតូ ម៉ាកហុងដាសេ១២៥ ឈ្មោះ ផុំ សាន្ត ភេទប្រុស អាយុ២១ឆ្នាំ មានមុខរបរជា ជាងជុសជុលរថយន្ត ស្នាក់ នៅក្នុងភូមិបាគូ សង្កាត់ដង្កោ ខណ្ឌដង្កោ ។ ចំណែកអ្នកបើកបរម៉ូតូស្ទេប ឈ្មោះ សែន ភារុន ភេទប្រុស អាយុ ២២ឆ្នាំ មានមុខរបរជាកម្មកររោងចក្រ ស្នាក់នៅក្នុងភូមិខ្វា សង្កាត់ដង្កោ ខណ្ឌដង្កោ ។

ក្រោយកើតហេតុ សមត្ថកិច្ចនគរបាលចរាចរខណ្ឌដង្កោ បានចុះអន្តរាគមន៍ វាស់វែង ដកហូតម៉ូតូទាំងពីរគ្រឿង យកទៅរក្សាទុកនៅអធិការរដ្ឋាននគរបាលខណ្ឌដង្កោ ដើម្បីរង់ចាំការដោះស្រាយ គ្នានៅពេល ក្រោយតាមនីតិវិធីច្បាប់ ៕