ល្អណាស់! UEFA ចង់អញ្ជើញជើងខ្លាំង ប្រស៊ីល និង អាហ្សង់ទីន ដើម្បីប្រកួតពានរង្វាន់មួយនេះនៅតំបន់អឺរ៉ុប

បរទេស៖ ស្របពេលដែល FIFA កំពុងតែមមាញឹកខ្លាំងជាមួយគម្រោងចង់ដំណើរការព្រឹត្តិការណ៍ World Cup រៀងរាល់ ២ ឆ្នាំម្តង, ខាង UEFA ឯណោះវិញក៏កំពុងតែរវល់ខ្លាំងជាមួយការប្រកួតប្រជែងពាន Nations League ផងដែរ។

លោក Aleksander Ceferin ដែលជាប្រធានសមាគមន៍បាល់ទាត់ អឺរ៉ុប ហៅកាត់ UEFA មានផែនការចង់អញ្ជើញក្រុមខ្លាំងរបស់ អាមេរិកឡាទីន ចំនួន ២ នោះគឺក្រុមជម្រើសជាតិ ប្រេស៊ីល និង អាហ្សង់ទីន ដើម្បីមកចូលរួមប្រកួតក្នុងពានរង្វាន់នៅតំបន់ អឺរ៉ុប។

យោងតាមការចុះផ្សាយរបស់ការសែត La Gazzetta dello Sport បានឱ្យដឹងថា UEFA គឺមានបំណងចង់ឱ្យពាន Nations League ត្រូវបានគេទទួលស្គាល់ទូទាំងសកល តាមរយៈការអញ្ជើញក្រុមមកពីសហព័ន្ធនីមួយៗដើម្បីមកចូលរួមប្រកួតប្រជែង។

យ៉ាងណាមិញ គំនិតបែបនេះក៏វាមិនមែនជាបញ្ហាចោទដែរ ដោយសារតែទំនាក់ទំនងរវាង សមាគមន៍បាល់ទាត់អឺរ៉ុប (UEFA) និង សមាគមន៍បាល់ទាត់អាមេរិកខាងត្បូង (CONMEBOL) គឺមានលក្ខណៈស្អិតរមួតមែនទែន, ជាពិសេសនៅ ខែ មិថុនា ឆ្នាំ ២០២២ ខាងមុខនឹងមា​នការរៀបចំការប្រកួតដ៏ធំមួយ រវាងក្រុម អាហ្សង់ទីន (ជើងឯក Copa America) ទល់នឹងក្រុម អ៊ីតាលី (ជើងឯក European Championships), ដែលនេះក៏ជាការរៀបចំរបស់សមាគមន៍បាល់ទាត់ប្រចាំទ្វីបទាំង ២ ផងដែរ៕

ប្រភព៖ Marca