ទីបំផុតយានអវកាសរបស់ណាសា ត្រូវបានដាក់ភ្ជាប់នៅលើរ៉ុក្កែត ដើម្បីរង់ចាំបេសកកម្មទៅឋានព្រះចន្ទ នាពេលខាងមុខ

អាមេរិក៖ យានអវកាសជំនាន់ថ្មីរបស់ណាសាត្រូវបានលើក ទៅដាក់ភ្ជាប់នៅលើរ៉ុក្កែត ដែលនឹងត្រូវបាញ់បង្ហោះវាទៅកាន់ឋានព្រះចន្ទនៅឆ្នាំនេះ ឬនៅដើមឆ្នាំ២០២២។ កាលពីថ្ងៃពុធ យានអវកាស Orion ត្រូវបានគេភ្ជាប់ទៅនឹងរ៉ុក្កែតប្រព័ន្ធបាញ់បង្ហោះអវកាស (SLS) នៅមជ្ឈមណ្ឌលអវកាស Kennedy Space Center ក្នុងរដ្ឋផ្លរីដា។ សម្រាប់ការហោះហើរនាពេលខាងមុខនេះ យានអវកាស Orion នឹងហោះហើរជុំវិញព្រះចន្ទ ដោយគ្មានអវកាសយានិកទៅជាមួយទេ។ ប៉ុន្តែចុងក្រោយបង្អស់ វានឹងដឹកមនុស្សដែលជាផ្នែកមួយនៃផែនការរបស់អាមេរិក ដើម្បីបញ្ជូនមនុស្សត្រលប់ទៅផ្ទៃឋានព្រះចន្ទវិញ នៅទសវត្សរ៍នេះ។

កម្មវិធីនេះត្រូវបានគេហៅថា Artemis បន្ទាប់ពីបេសកកម្មអាប៉ូឡូ ដែលបានជួយមនុស្សឲ្យមានវត្តមានរយៈពេលវែង នៅលើអង្គរណបធម្មជាតិតែមួយគត់របស់ផែនដីយើងនេះ។ នៅប៉ុន្មានសប្ដាហ៍ខាងមុខនេះ វិស្វករក៏នឹងធ្វើតេស្ដលើយានដែលបានផ្គុំ រួមជាមួយការហាត់សមដែលរ៉ុក្កែតប្រព័ន្ធបាញ់បង្ហោះអវកាស SLS បានផ្ទុកទៅដោយប្រេងឥន្ធនៈ ខណៈពេលការរាប់ថយក្រោយនៃការបាញ់បង្ហោះនឹងត្រូវធ្វើត្រឹមជាគំរូប៉ុណ្ណោះ។

ប្រព័ន្ធបាញ់បង្ហោះអវកាស SLS នឹងត្រូវបាញ់បញ្ជូនយាន Orion ជាផ្នែកមួយនៃបេសកកម្ម Artemis-1 ដោយមិនមានមនុស្សទៅជាមួយទេ។ ការហោះហើររយៈពេល៣សប្ដាហ៍នេះ នឹងសាកល្បងប្រព័ន្ធបាញ់បង្ហោះអវកាស SLS និងយាន Orion មុនពេលអវកាសយានិកត្រូវបានអនុញ្ញាតឲ្យជិះ សម្រាប់បេសកកម្ម Artemis-2 ដែលនឹងធ្វើដំណើរជុំវិញព្រះចន្ទ នៅចុងឆ្នាំ២០២៣។

បេសកកម្ម Artemis-3 នឹងបញ្ជូនមនុស្សទៅជាន់ដីឋានព្រះចន្ទជាលើកដំបូង ចាប់តាំងពីបេសកកម្មអាប៉ូឡូ១៧ ក្នុងឆ្នាំ១៩៧២មក។ អង្គការណាសាបានជ្រើសរើសនាវាអវកាស Starship របស់លោក Elon Musk ធ្វើជាយាន ដែលនឹងដឹកមនុស្សពីគន្លងគោចរ ចុះទៅកាន់ផ្ទៃព្រះចន្ទ។ យាន Orion នឹងចូលចតជាមួយនាវាអវកាស Starship ក្នុងគន្លងគោចរព្រះចន្ទ។ បន្ទាប់មក ក្រុមអវកាសយានិកនឹងឆ្លងចូលពីយាន Orion ទៅកាន់នាវាអវកាស Starship ដើម្បីចាប់ផ្ដើមត្រៀមខ្លួន សម្រាប់ការធ្វើដំណើរចុះទៅកាន់ផ្ទៃឋានព្រះចន្ទ។ បេសកកម្មដឹកមនុស្សចុះចតនៅលើឋានព្រះចន្ទត្រូវបានកំណត់ សម្រាប់ឆ្នាំ២០២៤ បើទោះជាក្រុមអ្នកសង្កេតការណ៍គិតថា កាលបរិច្ឆេទនោះអាចនឹងត្រូវរំកិល៕

ប្រភព: BBC