វត្តមួយនៅឥណ្ឌា ចិញ្ចឹមក្រពើជាង៧០ឆ្នាំដោយឲ្យស៊ីតែម្ហូបបួស

ឥណ្ឌា៖ វត្តហិណ្ឌូ Sri Ananthapura នៅស្រុក Kasaragod ភាគខាងជើងនៃរដ្ឋ Kerala បានក្លាយជាជម្រករបស់ក្រពើបួសញីមួយក្បាល ដែលមានឈ្មោះថា Babiya និងរស់នៅទីនោះអស់រយៈពេលជាង៧០ឆ្នាំមកហើយ។

រូបភាពជាច្រើនសន្លឹកនៃសត្វក្រពើបួសដ៏ធំ បានចុះផ្សាយដោយកាសែតព័ត៌មានអន្តរជាតិជាច្រើនកាលពីឆ្នាំមុន ដែលជួយបង្កើនប្រជាប្រិយភាពដល់វត្តផងដែរ។ ហើយក្រពើនេះ វាតែងតែសំងំនៅក្នុងស្រះទឹក និងរង់ចាំអាចារ្យយកអាហាបួសប្រចាំថ្ងៃឲ្យវាស៊ី ដោយមួយថ្ងៃពីរដងព្រឹកនិងថ្ងៃ ដែលភាគច្រើនជាបាយស១គីឡូក្រាម ដែលដាំឆ្អិនរួចប៉ុណ្ណោះ។

តួយ៉ាង តាមសម្ដីរបស់អាចារ្យម្នាក់ក្នុងវត្តបានឲ្យដឹងថា វាមិនដែលប៉ុនប៉ង ឬធ្វើការវាយប្រហារទៅលើនរណាម្នាក់ឡើយ សូម្បីតែសាច់បន្តិចបន្ដួចក៏គេមិនដែលដាក់ឲ្យស៊ីដែរ។ កាលពីឆ្នាំមុន វាបានវារឡើងមកលើគោក និងចូលវត្ត តែលោកអាចារ្យឈ្មោះ Chandraprakash Nambisan បានសុំឲ្យវារត្រលប់ទៅស្រះវិញ ហើយវាក៏បានធ្វើតាមសម្ដីផងដែរ។

យ៉ាងណាមិញ មកទល់សព្វថ្ងៃនេះ វត្តខាងលើនៅតែមានភាពល្បីល្បាញដដែល ដែលមានអ្នកទេសចរជាច្រើនក្នុងស្រុកបានទៅលេងកម្សាន្ត ដោយសារតែចង់ឃើញក្រពើបួសផ្ទាល់ភ្នែក៕

ប្រភព: Odditycentral

សូមទស្សនារូបភាពខាងក្រោម៖