អស់ពី Pedri និង Fati គឺ Barca គ្រោងនឹងចរចាបន្តកុងត្រាថ្មីដល់កីឡាករពីររូបនេះម្ដង

អេស្ប៉ាញ៖ យោងតាមការរាយការណ៍ពី Mundo Deporivo គឺ បន្ទាប់ពីបន្តកុងត្រាថ្មីជាមួយ ខ្សែបម្រើ Pedri Gonzalez និង Ansu Fati រួចរាល់ជាស្ថាពរមក Barcelona គ្រោងនឹងបើកការចរចាបន្តកុងត្រាថ្មីដល់ខ្សែបម្រើវ័យក្មេង Pablo Gavi និង ខ្សែការពារ Ronald Araujo ។

កីឡាករទាំងពីររូបនេះសុទ្ធតែបណ្ដុះចេញពីឈុតយុវជនរបស់ Barcelona ទាំងអស់ដោយ Gavi មានវ័យត្រឹមតែ១៧ឆ្នាំតែបានបង្ហាញទម្រង់លេងដ៏លេចធ្លោរហូតត្រូវកោះហៅចូលជម្រើសជាតិអេស្ប៉ាញទៀតផង ឯ Araujo វិញគឺបង្ហាញខ្លួនបាន៣៧ប្រកួតហើយឲ្យក្លិបយក្សនៅតំបន់កាតាឡាន់មួយនេះ។

ទាំងកុងត្រារបស់ Gavi និង Araujo សុទ្ធតែអស់សុពុលនៅឆ្នាំ២០២៣ ទើបក្លិបចង់ចងជើងពួកគេទុកក្នុងរយៈពេលវែង។

បន្ទាប់មក Barcelona នឹងបន្តការចរចាកុងត្រាជាមួយ ខ្សែបម្រើ Sergio Roberto ដែលអស់កុងត្រានៅរដូវក្ដៅក្រោយ ខណៈដែល ការចរចាបន្តកុងត្រាដល់ Ousmane Dembele នឹងតាមមកជាក្រោយ៕

ប្រភព៖ football-espana