បរទេស៖ អតីតខ្សែបម្រើឆ្នើមរបស់ក្រុម Manchester United លោក Paul Scholes ហាក់មិនមានអារម្មណ៍ភ្ញាក់ផ្អើលឡើយ ជុំវិញការវាយបកយកឈ្នះរបស់ក្រុម បិសាចក្រហម ទៅលើក្រុម Atalanta នៅក្នុងការប្រកួតពានរង្វាន់ Champions League កាលពីយប់មិញ, ក្នុងនោះលោកក៏បានព្រមានទៅក្រុមចាស់របស់ខ្លួនដែរ ដោយលោកបានលើកឡើងថា តាមទម្រង់លេងយប់មិញ ពួកគេអាចនឹងពិបាកបន្តិចហើយ ប្រសិនបើពួកគេជួបជាមួយក្រុមគូប្រជែងនៅ Premier League ២ នេះ រួមមាន Liverpool និង Man City ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
នៅក្នុងការប្រកួតយប់មិញ យើងឃើញថា Man UTD ស្ទើរតែបាត់បង់ឱកាសដណ្តើមយក ៣ ពិន្ទុទៅហើយ ក្រោយនៅវគ្គទី ១ ក្រុម Atalanta បាននាំមុខក្នុងលទ្ធផល ២ ទល់នឹង ០, ប៉ុន្តែអ្វីៗបានត្រឡប់មកល្អប្រសើរឡើងវិញ ក្រោយការប្រកួតឈានចូលវគ្គទី ២ ពួកគេអាចវាយបកបាន ៣ គ្រាប់មកវិញ រហូតបញ្ចប់ការប្រកួតក្រុមរបស់លោក Ole Gunnar Solskjaer បានទទួលជ័យជម្នះក្នុងលទ្ធផល ៣ ទល់នឹង ២។
ក្រោយបញ្ចប់ការប្រកួត លោក Scholes បានប្រសាសន៍លើកឡើងពី Man UTD ប្រាប់ទៅកាន់ BT Sport យ៉ាងដូច្នេះថា៖
មុនការប្រកួតខ្ញុំពិតជារំភើបណាស់ ប៉ុន្តែនៅពេលខ្ញុំមើល Man UTD លេងនៅវគ្គទី ១ ខ្ញុំបានប្រែមិនសប្បាយចិត្តទៅវិញ ហើយខ្ញុំគិតថា បើទម្រង់លេងនៅវគ្គទី ១ បែបនេះទៅហើយ អ៊ីចឹងនៅវគ្គទី ២ ខ្ញុំនឹងមិនមើលទេ។ ខ្ញុំគិតថា ប្រសិនបើពួកគេចេះលេងជាក្រុមបានល្អជាងនេះ នោះពួកគេនឹងមិនងាយរបូតគ្រាប់បាល់ឡើយ។ នៅវគ្គទី ១ វាបានធ្វើឱ្យខ្ញុំបារម្ភខ្លាំង។ ខ្ញុំមើលទៅ ក្រុមទាំងមូលពិតជាខ្វះការសាមគ្គីគ្នាខ្លាំងណាស់, នោះហើយជាក្តីបារម្ភជាងគេសម្រាប់ខ្ញុំ។ បើបែបនេះ តើពួកគេអាចលេងជាមួយ Liverpool ទេ។... តើអ្នកអាចលេងជាមួយក្រុម Manchester City ទេ? តើអ្នកអាចលេងជាមួយក្រុមកំពូលនៅ Champions League បានទេ? ខ្ញុំមិនចង់ឮថាអ្នកជាក្រុមដែលអន់ជាងគេឡើយ ប៉ុន្តែយ៉ាងណាខ្ញុំពិតជាបារម្ភមែនទែន នៅពេលឃើញទម្រង់លេងក្នុងវគ្គទី ១៕
ប្រភព៖ Goal
Bong I.T