Barca ទំនងបោះបង់ការចាប់អារម្មណ៍លើ Haaland ហើយងាកទៅរកម្នាក់នេះ ជំនួសវិញ

អឺរ៉ុប៖ យោងតាមសេចក្ដីរាយការណ៍បានឲ្យដឹង ក្លិបអ្នកមានបុណ្យ Barcelona អាចនឹងបោះបង់ការចាប់អារម្មណ៍លើខ្សែប្រយុទ្ធ Erling Haaland របស់ក្លិប Borussia Dortmund ហើយងាកទៅរក Alexander Isak របស់ Real Sociedad ជំនួសវិញ នៅរដូវកាលក្រោយ។

ពិតណាស់ Haaland ត្រូវគេរំពឹងថានឹងចាកចេញពីក្លិប Dortmund មុនរដូវកាលថ្មី ២០២២-២០២៣ ហើយក្លិបធំៗនៅអឺរ៉ុប រួមទាំង Barcelona ជាក្លិបដែលនឹងប្រជែងគ្នា ដើម្បីចុះហត្ថលេខាយករូបគេ។

យ៉ាងណាមិញ ដោយសារតែបញ្ហហិរញ្ញវត្ថុ អាចធ្វើឲ្យក្រុមនៅតំបន់កាតាឡាន់មួយនេះ ដកខ្លួនថយ ហើយយោងតាមសារព័ត៌មាន AS បានឲ្យដឹងថា ពួកគេបានចាត់ទុក Isak ជាជម្រើសបន្ទាប់។

ទោះជាយ៉ាងណា Real Sociedad ស្ថិតក្នុងជំហររឹងមាំនៅពេលនិយាយអំពីអនាគតរបស់ខ្សែប្រយុទ្ធវ័យ ២២ឆ្នាំរូបនេះ ខណៈដែលកិច្ចសន្យារបស់គេជាមួយនឹងក្លិប មានសុពលភាពរហូតដល់ឆ្នាំ ២០២៦ឯណោះ ជាមួយនឹងតម្លៃផ្ដាច់កុងត្រាដល់ទៅ ៩០លានអឺរ៉ូ (ឬប្រមាណ ១០៤លានដុល្លារអាមេរិក)៕

ប្រភព៖ sportsmole