ចង់ចេញជូនតាមសំណើ! ទីបំផុត Man City ប្រកាសលក់ខ្សែប្រយុទ្ធឆ្នើមរូបនេះហើយ ដោយដាក់តម្លៃខ្លួនរហូតដល់ទៅ ៨០លានអឺរ៉ូ

បរទេស៖ ក្លិប Manchester City ត្រូវបានគេរាយការណ៍មកថា ពួកគេបានដាក់តម្លៃខ្លួនចំនួន ៨០ លានអឺរ៉ូ ឬប្រមាណជា (៩៣ លានដុល្លាអាមេរិក) ដើម្បីលក់ចេញខ្សែប្រយុទ្ធស្លាប Raheem Sterling នៅរដូវកាលខាងមុខ។

នារយៈពេលចុងក្រោយនេះ កីឡាករវ័យ ២៦ ឆ្នាំហាក់ពុំសូវទទួលបានឱកាសបង្ហាញខ្លួនជម្រើសដំបូងជាប់លាប់ក្រោមការដឹកនាំរបស់លោក Pep Guardiola ឡើយ, ជាមួយគ្នានេះ គាត់ក៏ទើបតែបានបញ្ជាក់ដែរថា គាត់ចង់ចាកចេញដើម្បីស្វែងរកទ្រនំថ្មី ប្រសិនបើមានឱកាសសមស្រប។

Man City ត្រូវបានគេរំពឹងថា នឹងអាចរក្សាទុកខ្សែប្រយុទ្ធខាងលើបាន, ប៉ុន្តែឥឡូវនេះ Barcelona កំពុងមានទំនាក់ទំនងផ្សារភ្ជាប់ខ្លាំងមែនទែន, ស្របពេលដំណាលគ្នានេះ ក្លិបយក្សរបស់ អេស្ប៉ាញ ក៏អាចបាត់បង់ Ousmane Dembele ដែរ ដោយសារកិច្ចព្រមព្រៀងរវាងពួកគេទាំង ២ គឺកៀកនឹងដល់ពេលបញ្ចប់ហើយ។

យោងតាមរបាយការណ៍របស់សារព័ត៌មាន Marca បានឱ្យដឹងថា, Man City ទំនងជាមិនអាចរក្សាទុក Sterling ឱ្យស្នាក់នៅបន្តបានទេ, ហើយឥឡូវនេះក្លិបម្ចាស់ជើងឯក Premier League បានរៀបចំរួចរាល់ហើយ ដោយពួកគេបានដាក់តម្លៃខ្លួនខ្សែប្រយុទ្ធខាងលើចំនួន ៨០ លានអឺរ៉ូ ឬប្រមាណជា (៩៣ លានដុល្លាអាមេរិក) ដើម្បីលក់ចេញនៅរដូវកាលខាងមុខ៕

ប្រភព៖ Sportsmole