អីយ៉ាស់! ស្ងាត់ៗ Mourinho ចង់នាំយកកីឡាករ Barcelona រូបនេះទៅ Roma

អ៊ីតាលី៖ យោងតាមសារព័ត៌មាន Diario Sport គឺ លោកគ្រូបង្វឹក Jose Mourinho នៃក្រុម Roma កំពុងមានចំណាប់អារម្មណ៍ចង់នាំយក ខ្សែបម្រើ Riqui Puig របស់ក្លិប Barcelona ទៅចូលរួមជាមួយក្លិបរបស់លោក។

តាំងពីលោក Ronaldo Koeman ចូលមកដឹកនាំ គឺ Puig កម្រមាននាទីបានចូលលេងណាស់ដោយខ្សែបម្រើវ័យក្មេងរូបនេះពុំស្ថិតនៅក្នុងគម្រោងរបស់លោកឡើយ ប៉ុន្តែ Puig នៅតែជម្នះចង់ស្នាក់នៅទឹកដី Camp Nou បន្តទៀតព្រោះតែទឹកចិត្តស្រឡាញ់ក្លិប។

ដោយឡែក លោកគ្រូ Mourinho ដែលកំពុងដឹកនាំក្លិប Roma នៅក្របខណ្ឌអ៊ីតាលី Serie A សម្លឹងឃើញសមត្ថភាពរបស់ខ្សែបម្រើរូបនេះនឹងចង់យកទៅរួមក្រុមជាមួយ ដោយកន្លងមកលោកក៏ធ្លាប់បានបញ្ចុះបញ្ចូលខ្សែប្រយុទ្ធ Tammy Abraham ឲ្យមកចូលរួមជាមួយ Roma បានសម្រេចផងដែរ។

ខណៈនេះដែរ ស្ថានភាពរបស់ Riqui Puig នៅ Barcelona ក៏ពុំសូវល្អប៉ុន្មានដែរ ដោយសារមានខ្សែបម្រើឆ្នើមទើបនឹងរះគឺ Gavi ដែលវាអាចជាកត្តាជំរុញឲ្យកីឡាករវ័យ២២ឆ្នាំរូបនេះចាកចេញពីក្លិប៕

ប្រភព៖ football-espana