កម្រ! មេគោមួយក្បាល កើតកូនបានដល់ទៅ៣ក្បាល លុះពេលគេសុំទិញ ម្ចាស់មិនព្រមលក់

វៀតណាម៖ កាលពីប៉ុន្មានថ្ងៃមុននេះ មានករណីដ៏កម្រមួយបានកើតឡើងនៅតំបន់ Ngoc Lac នៃខេត្ត Thanh Hoa ប្រទេសវៀតណាត ដោយមេគោមួយក្បាល បានកើតកូនរហូតដល់ទៅបីក្បាលក្នុងពេលតែមួយ។ ហើយករណីនេះដែរ ខាងអាជ្ញាធរក្នុងតំបន់ក៏បានបញ្ជាក់ថា ហេតុការណ៍ពិតជាការពិតទាំងស្រុងផងដែរ។

តួយ៉ាង កាលពីមុនធ្លាប់មានករណីមេគោមួយក្បាលកើតកូនបានពីរក្បាលក្នុងពេលតែមួយម្ដងរួចមកហើយនៅឯទីកន្លែងផ្សេង តែករណីមេគោកើតកូនបានបីក្បាលនេះ គឺជាលើកទីមួយនៅក្នុងស្រុក។ ទោះជាយ៉ាងណាក៏ដោយ មេគោនិងកូនៗទាំងបីក្បាលរបស់វាមានសុខភាពយ៉ាងល្អ ដែលចំពោះកូនគោនីមួយៗវិញមានទម្ងន់ជាង៣គីឡូក្រាមផងដែរ។

យ៉ាងណាមិញ ក្រោយពីរឿងរ៉ាវខាងលើទទួលបានការចាប់អារម្មណ៍ និងល្បីល្បាញរួចមក មានគេចង់ទិញកូនគោទាំងបីក្បាលពីលោក Van Son ដែលជាម្ចាស់ ក្នុងតម្លៃ១០០លានដុង (ប្រមាណ៤,៤០០ដុល្លារអាមេរិក) តែលោកមិនព្រមលក់ឡើយ៕

ប្រភព: vietnamnet

សូមទស្សនារូបភាពខាងក្រោម៖