ក្រុមការងាររបស់រុស្ស៊ីបានវិលត្រឡប់ មកកាន់ផែនដីវិញ ក្រោយពីបានថតកុននៅទីអវកាស ជាលើកដំបូង

បរទេស៖ អ្នកថតកុនរុស្ស៊ីបានវិលត្រឡប់មកកាន់ផែនដីវិញ បន្ទាប់ពីបញ្ចប់ឈុតឆាកសម្រាប់ការថតខ្សែភាពយន្តលើកដំបូង នៅទីអវកាស។ លោក Klim Shipenko និងតារាសម្ដែង អ្នកនាង Yulia Peresild បានចាកចេញពីស្ថានីយអវកាសអន្តរជាតិ (ISS) ហើយបានចុះចតនៅប្រទេសកាសាក់ស្ថាន ដែលជាតម្រូវការក្នុងការថតឈុតចុះចត។

ការថតនៅស្ថានីយអវកាសអន្តរជាតិគឺសម្រាប់ខ្សែភាពយន្តមួយ ដែលមានចំណងជើងថា Challenge។ កាលពីថ្ងៃសុក្រ ISS បានផ្អៀងដោយមិនបានរំពឹងទុក បន្ទាប់ពីមានបញ្ហាក្នុងឧបករណ៍រុញច្រាន ដោយបានផ្អាកការថត។ វាមិនមែនជាផ្នែកមួយ ដែលត្រូវបានគេរំពឹងទុកថាមាននៅក្នុងខ្សែភាពយន្តទេ។

នៅពេលការចាកចេញពី ISS អ្នកនាង Peresild បានបង្ហាញពីសក់របស់គាត់បានអណ្ដែតក្នុងលំហ ក៏ព្រោះតែមានទំនាញទាប នៅលើបណ្ដាញសង្គម Twitter។ ម៉ូឌុលដែលដឹកអ្នកនាង Peresild និងលោក Shipenko រួមជាមួយអវកាសយានិក លោក Oleg Novitskiy បានសណ្ដោងដោយឆត្រយោង ចុះមកកាន់ផែនដី នៅវេលាម៉ោងអាហារថ្ងៃត្រង់ កាលពីថ្ងៃអាទិត្យ នៅវាលស្មៅប្រទេសកាសាក់ស្ថាន។

ការចាកចេញរបស់ពួកគាត់មិនត្រូវបានពន្យារពេល ដោយសារបញ្ហាកាលពីថ្ងៃសុក្រនោះទេ ដែលបណ្ដាលឲ្យបាត់បង់ការគ្រប់គ្រងទីតាំង ប្រហែលកន្លះម៉ោងប៉ុណ្ណោះ៕

ប្រភព: BBC