អុញនោះ! តាមការស្ទង់មតិរបស់ Marca មានអ្នកគាំទ្រ ៨៧ភាគរយស្នើឱ្យ Man UTD ចាត់វិធានការបែបនេះទៅលើលោក Ole

បរទេស៖ ការបរាជ័យ ៤ ទល់នឹង ២ ក្រោមថ្វីជើងក្រុម Leicester City គឺជាលទ្ធផលដ៏ខកចិត្តចុងក្រោយមួយរបស់ក្រុម Manchester United, យ៉ាងណាមិញ នាការប្រកួត ៥ លើកចុងក្រោយ, ក្រុមបិសាចក្រហមទើបតែឈ្នះបាន ១ ប្រកួតប៉ុណ្ណោះ, ក្រៅពីនេះពួកគេស្មើ ១ និង ចាញ់ ៣។

យ៉ាងណាមិញ កៅអីរបស់លោក Ole Gunnar Solskjaer កំពុងឡើងកម្តៅខ្លាំងមែនទែន ដោយឥឡូវនេះមានអ្នកគាំទ្រជាច្រើនកំពុងបង្ហាញអាការៈមិនពេញចិត្ត និងស្នើសុំចង់ឱ្យក្លិបពិចារណាបណ្តេញគ្រូបង្វឹករូបនេះចេញពីតំណែងទៀតផង។ គួរបញ្ជាក់ថា កុងត្រារបស់លោក Ole ជាមួយនឹង Man UTD និងផុតកំណត់នៅខែ មិថុនា ឆ្នាំ ២០២៤ ខាងមុខ។

រំលងប៉ុន្មានម៉ោងបន្ទាប់ពីការបរាជ័យរបស់ Man UTD កាលពីថ្ងៃ សៅរិ៍, ខាងសារព័ត៌មាន Marca ជាភាសាអង់គ្លេសបានធ្វើការស្ទង់មតិអំពីស្ថានភាពរបស់អ្នកគាំទ្រក្រុម Man UTD បច្ចុប្បន្ន។ ក្នុងនោះតាមរយៈបោះឆ្នោតរបស់អ្នកគាំទ្រជាង ២,០០០ នាក់បានឱ្យដឹងថា ពួកគេគឺចង់ឱ្យក្លិបបណ្តេញគ្រូបង្វឹកសញ្ជាតិ ន័រវេស ចេញពីតំណែងមានរហូតដល់ទៅ ៨៧ ភាគរយឯណោះ៕

ប្រភព៖ Marca