ពិតជាអស្ចារ្យ សារមន្ទីរវិទ្យាសាស្ត្រមួយនៅអង់គ្លេស ដាក់តាំងបង្ហាញផែនដីដ៏ធំ ប្រៀបដូចអ្នកទស្សនា ឃើញពីអវកាស

អង់គ្លេស​៖ រូបតំណាងនៃផែនដីត្រូវបានគេដំឡើងក្នុងសារមន្ទីរវិទ្យាសាស្ត្រ Centre for Life ស្ថិតនៅទីក្រុង Newcastle។ រូបផែនដីដែលត្រូវបង្កើតឡើងដោយសិល្បៈករជនជាតិអង់គ្លេស លោក Luke Jerram មានមុខកាត់៧ម៉ែត្រ និងមានលក្ខណៈលម្អិតនៃរូបភាពផ្ទៃផែនដីដែលថតដោយអង្គការណាសា។

ស្នាដៃសិល្បៈដែលព្យូរចោលនេះ ផ្ដល់ឲ្យអ្នកទស្សនាទៅកាន់សារមន្ទីរវិទ្យាសាស្ត្រ នូវរូបរាងនៃផែនដីដែលត្រូវបានគេមើលឃើញពីអវកាស។ លោក Jarram បាននិយាយថា៖ «នៅពេលអ្នកស្ថិតនៅក្នុងលំហ សម្លឹងមើលមកកាន់ភពផែនដី អ្នកនឹងដឹងច្បាស់ថា យើងមានភាពទន់ខ្សោយប៉ុណ្ណា និងរបៀបដែលយើងទាក់ទងគ្នា ខណៈពេលដែលយើងទាំងអស់គ្នាកំពុងរស់នៅលើគែមដ៏ស្ដើងនៃភពមួយ ហើយយើងស្ថិតនៅក្នុងស្ថានភាពពិតជាងាយរងគ្រោះ»។

ស្នាដៃសិល្បៈនេះចំណាយពេលប្រហែល៦ខែដើម្បីបង្កើត ជាមួយនឹងរូបភាពដែលបានបោះពុម្ពនៅលើក្រណាត់ ដែលត្រូវបានគេដេរភ្ជាប់គ្នា ជាប៉េងប៉ោងមួយ ហើយមានពន្លឺបំភ្លឺដាក់ពីខាងក្នុង។ លោក Jerram និយាយថា គាត់សង្ឃឹមថាវានឹងជួយលើកទឹកចិត្តគ្រួសារនានា ឲ្យធ្វើសកម្មភាពប្រឆាំងនឹងការប្រែប្រួលអាកាសធាតុ។ លោកបានបន្តទៀតថា៖ «យើងមានផែនដីតែមួយប៉ុណ្ណោះ ហើយយើងត្រូវមើលថែរក្សាវា»៕

ប្រភព: BBC