ដើម្បីបញ្ជាក់ឲ្យកាន់តែច្បាស់ Samsung បានទម្លាក់វីដេអូមួយ បង្ហាញពីភាពធន់នៃទូរសព្ទអេក្រង់បត់របស់ខ្លួន

បរទេស៖ ក្រុមហ៊ុន Samsung បានបង្ហាញចំណុចលម្អិតថ្មី អំពីរបៀបនៃការធ្វើតេស្ដភាពធន់របស់ទូរសព្ទអេក្រង់បត់ Galaxy Z Fold 3 និង Z Flip 3។ ទោះជាយ៉ាងណា គេមិនច្បាស់ទេថា ហេតុអ្វីបានជាក្រុមហ៊ុន Samsung ទើបបញ្ចេញព័ត៌មាននេះ ក្នុងពេលឥឡូវ ដែលទូរសព្ទទាំងពីរនេះបានបញ្ចេញតាំងពីខែសីហា។

នោះនាំឲ្យគេគិតថា វាអាចជាការស្រាយបំភ្លឺដើម្បីបំបាត់ចម្ងល់ ដែលបណ្ដាលមកពីរបាយការណ៍ថ្មីនៃការស្រាំអេក្រង់ទូរសព្ទ Galaxy Z Flip 3។

នៅក្នុងវីដេអូដែលបានបង្ហោះនៅលើគេហទំព័ររបស់ខ្លួន ក្រុមហ៊ុន Samsung បង្ហាញពីការធ្វើតេស្ដចំនួន៤ដាច់ដោយឡែកពីគ្នា។ តេស្ដដំបូងគេបានដាក់ទូរសព្ទនៅក្នុងទូមួយ ដែលក្រុមហ៊ុនបានធ្វើតេស្ដទូរសព្ទក្រោមអាកាសធាតុខុសៗគ្នា ដើម្បីប្រាកដថាពួកវានៅតែដំណើរការ។ ការធ្វើតេស្ដមួយបានធ្វើឡើងនៅក្នុងទឹក។ ការធ្វើតេស្ដមួយទៀតបានប្រើប្រាស់ដៃរ៉ូបូត ដើម្បីសាកល្បងដំណើរការប៊ិក S Pen នៅលើ Z Fold 3។ ការធ្វើតេស្ដទីបួនបានសាកល្បងភាពបត់បើករបស់ទូរសព្ទទាំងពីរ ម្ដងហើយម្ដងទៀត៕

ប្រភព: The Verge