ភ្នំពេញ៖ ប្រធានមន្ទីរអប់រំ យុវជន និងកីឡា លោក ហែម ស៊ីណារ៉េត បានឱ្យដឹង នៅរសៀលថ្ងៃទី៨ ខែតុលានេះថា បន្ទាប់ពីធ្វើតេស្តទៅលើលោកគ្រូអ្នកគ្រូនៅរាជធានីភ្នំពេញពីថ្នាក់ទី៧ ដល់ថ្នាក់ទី១២ ជាបន្តបន្ទាប់ បានរកឃើញគ្រូបង្រៀនចំនួន២នាក់ ស្រី ១នាក់ និងប្រុស ១នាក់ ឆ្លងជំងឺកូវីដ-១៩ ហើយត្រូវបានអនុញ្ញាតឱ្យសម្រាកព្យាបាលជំងឺនៅតាមផ្ទះ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សលោកបានបន្តថា តាមគម្រោងមន្ទីរអប់រំរាជធានីនឹងត្រូវធ្វើតេស្តដល់គ្រូបង្រៀនជាបន្តបន្ទាប់ ព្រោះថាមានគ្រូខ្លះត្រូវត្រលប់មកពីស្រុកកំណើតខុសគ្នាទៅតាមកម្មវិធីសិក្សារបស់គាត់ តែប្រហែលជាថ្ងៃស្អែកនឹងត្រូវបញ្ចប់ហើយ។ រដ្ឋបាលរាជធានីភ្នំពេញបានណែនាំដល់មន្ទីរអប់រំ យុវជន និងកីឡា ធ្វើតេស្តគ្រូបង្រៀននៅរាជធានីភ្នំពេញចំនួន៧ពាន់នាក់ និងគ្រូបង្រៀនសាលាឯកជនជាមុនសិន ទើបអនុញ្ញាតឱ្យចូលបង្រៀន។
គួរឱ្យដឹងដែរថា រាជរដ្ឋាភិបាលបានណែនាំក្រសួង-ស្ថាប័ន និងវិស័យឯកជន ពិសេស បណ្តារោងចក្រ-សហគ្រាស និងទីតាំងអាជីវកម្ម ដែលមានកម្មករ-និយោជិត និងបុគ្គលិកបម្រើការងារច្រើន ព្រមទាំងគ្រឹះស្ថានសិក្សានានានៅក្រោយពេលពិធីបុណ្យភ្ជុំបិណ្ឌ ត្រូវធ្វើតេស្តរហ័សចំពោះមន្ត្រីរាជការ កម្មករ-និយោជិត និងបុគ្គលិក និងបុគ្គលិកអប់រំ ដើម្បីធានាសុវត្ថិភាព ក៏ដូចជាទប់ស្កាត់ការឆ្លងរាលដាលនៃជំងឺកូវីដ-១៩ នៅតាម ក្រសួង-ស្ថាប័ន គ្រឹះស្ថានសិក្សា និងបណ្តារោងចក្រ-សហគ្រាស និងទីតាំងអាជីវកម្មនានា៕
ប្រភព៖ កម្ពុជាថ្មី