បរទេស៖ កីឡាករ Raphael Varane បានរៀបរាប់អំពីការវិវឌ្ឍន៍ភាពជាដៃគូរបស់គាត់ជាមួយ Harry Maguire ក្នុងនាមជាខ្សែការពារកណ្តាលរបស់ក្រុម Manchester United។ ខណៈខ្សែការពារសញ្ជាតិ បារាំង រូបនេះជាកីឡាករមួយរូបដែលផ្លាស់មកកាន់ទឹកដី Old Trafford នៅរដូវក្តៅនេះជាមួយ Jadon Sancho និង Cristiano Ronaldo។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
Varane ពិតជាជោគជ័យខ្លាំងមែនទែនកំលុងពេលរួមរស់ជាមួយអតីតក្លិបចាស់ Real Madrid, តួយ៉ាងរូបគេធ្លាប់បានជួយឱ្យក្រុម អធិរាជសឈ្នះជើងឯកពានរង្វាន់ Champions league ចំនួន ៤ ដង និងអ្វីដែលកាន់តែពិសេសជាងនេះទៅទៀតនោះ រូបគេធ្លាប់បានឈ្នះជើងឯកពានរង្វាន់បាល់ទាត់ពិភពលោក នៅឆ្នាំ ២០១៨ ជាមួយក្រុមជម្រើសជាតិ បារាំង ផងដែរ។
ក្រោយបានចាប់ដៃគូគ្នានៅលើទីលានជាមួយ Maguire ឱ្យក្រុម Man UTD នាប៉ុន្មានប្រកួតកន្លងមកនេះ Varane បានរៀបរាប់អំពីស្ថានភាពរវាងពួកគេទាំង ២ ប្រាប់ទៅកាន់ទូរទស្សន៍ TV2 យ៉ាងដូច្នេះថា៖
គាត់ (Maguire) ជាកីឡាករកំពូលម្នាក់។ នៅលើទីលានពួកយើងតែងតែសិក្សាពីគ្នា ដើម្បីបន្ថែមការយល់ចិត្តឱ្យបានល្អជាងនេះ។ យើងតែងតែជជែកគ្នាដើម្បីស្វែងរកគន្លឹះ និងព្យាយាមសហការគ្នាឱ្យកាន់តែល្អប្រសើរ, ហើយនៅក្នុងវិធីទាំងអស់នោះ យើងគឺជួយគ្នាតាមរយៈការបត់បែនជួយគ្នានៅលើតួនាទីរបស់កីឡាករនីមួយៗ។ ពិតណាស់ នេះមិនមែនសម្រាប់តែខ្ញុំតែម្នាក់ និង Harry ប៉ុណ្ណោះទេ, ប៉ុន្តែវាគឺសម្រាប់ខ្សែការពារទាំងអស់គ្នា។ ជារឿងចាំបាច់ណាស់ យើងគឺត្រូវការពេលវេលាបន្ថែមទៀត ដើម្បីធានាថាពួកយើងកាន់តែរលូន, ហើយខ្ញុំហ៊ានប្រាកដថាពួកយើងនឹងធ្វើបានល្អ ដោយសារតែកីឡាកររបស់យើងសុទ្ធតែជាកីឡាករដែលមានគុណភាព។ ខ្ញុំគិតថា ម្តងបន្តិចៗយើងនឹងអាចអភិវឌ្ឍន៍ខ្លួនទៅមុខជាដរាប, ហើយនៅពេលនោះយើងនឹងអាចរកឃើញភាពជាដៃគូដែលមានស្ថេរភាពពេញលេញ៕
ប្រភព៖ The Mirror
Bong I.T