មកស្គាល់កូនកាតាបយន្ត មិនចាំបាច់ស្ពាយ ឲ្យវាដើរតាមយ៉ាងស្រួល

បរទេស៖ ត្រលប់ទៅកាន់ឆ្នាំ២០១៩ ក្រុមហ៊ុន Piaggio Fast Forward (PFF) បានចេញនូវការចាប់ផ្ដើមលើកដំបូងនៃកាតាបដឹកអីវ៉ាន់ស្វ័យប្រវត្តិ សម្រាប់អ្នកថ្មើរជើង ដែលគេហៅថា Gita។ រយៈពេលពីរឆ្នាំក្រោយនិងកែសម្រួលការរចនា ក្រុមហ៊ុន PFF នឹងបញ្ចេញម៉ូតតូចជាងមុន ដែលគេហៅថា Gitamini នៅខែតុលានេះ។

ជាមួយនឹងចំណុះនៃការផ្ទុកអីវ៉ាន់រហូតដល់ជិត២,០០០អ៊ីញគូប និងមានសមត្ថភាពអាចផ្ទុកបានទម្ងន់រហូតដល់១៨គីឡូក្រាម និងធ្វើដំណើរក្នុងល្បឿនជាង៩គីឡូម៉ែត្រក្នុងមួយម៉ោង កាតាបយន្ត Gita ជំនាន់ដើមគឺជាម៉ាស៊ីនធំគួរឲ្យភ្ញាក់ផ្អើល ដែលអាចធ្វើជារទេះដាក់ទំនិញគ្រឿងទេសបាន។ ទោះជាយ៉ាងណា ទំហំរបស់កាតាបយន្ត Gita បានធ្វើឲ្យវា ក្លាយជាទំនួលខុសត្រូវចំពោះអ្នកថ្មើរជើងផ្សេងទៀត នៅពេលធ្វើដំណើរលើផ្លូវដែលមានមនុស្សច្រើន។

ចំពោះ Gitamini វាអាចផ្ទុកចំណុះបាន៩៩០អ៊ីញគូប ហើយវាមានទម្ងន់ជាង១២គីឡូក្រាម។ កូនកាតាបយន្តនេះអាចដឹកអីវ៉ាន់រហូតដល់ទម្ងន់៩គីឡូក្រាម។ ម៉ូឌែលតូចនេះអាចធ្វើដំណើរបានចម្ងាយអតិបរមាជាង៣៣គីឡូម៉ែត្រ ឬប្រហែល៦ម៉ោងនៃការប្រើប្រាស់មុននឹងត្រូវបញ្ចូលថ្មម្ដងទៀត។ ជាមួយប៊ូតុងចុចនៅលើខ្លួនវា ម៉ូឌែលតូចនេះអាចស្វែងរកស្វ័យប្រវត្តិ និងស្គាល់ហើយដើរតាមម្ចាស់វា ដោយប្រើសញ្ញាមើលឃើញនិងរ៉ាដា ដូចជាពណ៌និងចលនា ដែលរ៉ូបូតនេះមិនចាំបាច់ត្រូវការ GPS ឬការតភ្ជាប់បណ្ដាញឥតខ្សែ ដើម្បីដំណើរការនោះទេ។

កូនកាតាបយន្ត Gitamini ត្រូវបានគេគ្រោងនឹងដាក់លក់ក្នុងតម្លៃ១,៨៥០ដុល្លារ នៅថ្ងៃទី១៥ ខែតុលា៕

ប្រភព: Engadget