ឥទ្ធិពលការកែសម្ផស្ស! តារាស្រីរូបនេះបាត់បង់ការងារសិល្បៈជាច្រើនដោយសារកែមុខខុសបច្ចេកទេស

ចិន៖ ជាការពិតណាស់ មានករណីជាច្រើននៃភាពស្រស់ស្អាតរបស់តារាល្បីៗនៅក្នុងវិស័យសិល្បៈ ដែលកំពុងជួបការលំបាកដោយសារតែការកែសម្ផស្សរបស់ខ្លួន ហើយនៅក្នុងនោះដែរ  តារាស្រីដែលពោរពេញទៅដោយទេពកោសល្យ Lou Yixiao ក៏កំពុងតែជួបប្រទះនូវបញ្ហានេះ ដោយសារតែការបរាជ័យទៅលើផ្នែកកែសម្ផស្សរបស់នាង។ 

មិនត្រឹមតែប៉ុណ្ណោះ នៅលើបណ្ដាញសង្គមថ្មីៗនេះ ក៏មានព័ត៌មានជាច្រើន ដែលបានលើកឡើងអំពីស្ថានភាពបច្ចុប្បន្នរបស់ Lou Yixiao បន្ទាប់ពីបានវះកាត់កែសម្ផស្សរួចមក ភាពស្រស់ស្អាតនៃសម្រស់របស់នាង ស្រាប់តែមានការផ្លាស់ប្តូរយ៉ាងឆាប់រហ័សទៅក្នុងទិសដៅអវិជ្ជមាន ជាមួយនឹងមុខស្រអាប់ មានស្នាមជ្រីវជ្រួញ បង្ហាញពីសញ្ញាភាពជាស់ ដែលធ្វើឱ្យទស្សនិកជនជាច្រើន ស្ទើរតែមិនជឿនឹងភ្នែករបស់ពួកគេ។

ម៉្យាងវិញទៀត នៅក្នុងនោះក៏មានការលើកឡើងទៀតថា នេះអាចជាលទ្ធផលដែលពេលនេះ តារាសម្តែងស្រីរូបនេះមិនអាចស្វែងរកគម្រោងថតខ្សែភាពយន្តថ្មីៗបាននោះទេ។ ដោយមិនមានភាពស្រស់ស្អាតបែបនេះ Lou Yixiao  ពិតជាពិបាកក្នុងការផ្លាស់ប្តូរ និងបង្ហាញខ្លួនសាជាថ្មីម្ដងទៀត ហើយប្រភពជាច្រើនក៏បានជឿជាក់ថា នាងមិនអាចសូម្បីតែទទួលបានការថតជាតួសម្ដែងរាយរង ថែមទៀតផង។

យ៉ាងណាមិញ បច្ចុប្បន្ននេះ តារាស្រីរូបនេះ អាចផ្តោតតែលើ ការផ្សាយផ្ទាល់ពីការលក់ផលិតផល ដើម្បីរកប្រាក់ចំណូលបន្ថែម ដែលនេះគឺជាការងារដែលតារាចូលនិវត្តន៍ និងតារាជើងចាស់ជាច្រើន បានជ្រើសរើសនាពេលថ្មីៗនេះ៕

ប្រភព៖ Kenh14

សូមទស្សនារូបភាពខាងក្រោម៖