អង់គ្លេស៖ លោក Rio Ferdinand បានលើកឡើងថា Manchester United និង Liverpool អាចនឹងមានឱកាសក្នុងការទិញយកកីឡាករ Raheem Sterling ប្រសិនបើខ្សែប្រយុទ្ធរូបនេះបន្តមិនសប្បាយចិត្តក្នុងការលេងឲ្យ Manchester City។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
ជាការពិតណាស់ ក្នុងរយៈពេល១២ខែចុងក្រោយនេះ គឺ Sterling ពុំទទួលបានឱកាសជាប់លាប់ក្នុងការបង្ហាញខ្លួនជាជម្រើសដំបូងឡើយ ចំណែក រដូវកាលនេះវិញ រូបគេលេងជាជម្រើសដំបូងបានពីរដងក្នុងចំណោម៦ប្រកួត។ បញ្ហានេះហើយក៏បានកើតចេញជាពាក្យចចាមអារ៉ាម ថា កីឡាករសញ្ជាតិអង់គ្លេសអាចនឹងចាកចេញពី Man City នៅក្នុងឆាប់ៗនេះ។
លោក Ferdinand បាននិយាយថា៖
តើ Sterling នៅទីណា? គាត់បានបាត់បង់ទំនុកចិត្តពីព្រោះគាត់មិនបានបង្ហាញខ្លួននៅលើទីលាន។ គាត់ជាកីឡាករសំខាន់ជាច្រើនឆ្នាំមកហើយ នៅពេលដែលក្រុមកំពុងត្រូវការគ្រាប់បាល់ ប៉ុន្តែ ពេលនេះគាត់បែរជាស្ងប់ស្ងាត់ទៅវិញ។ ខ្ញុំមិនយល់នោះទេ។ ប្រសិនបើខ្ញុំជា Liverpool ខ្ញុំនឹងទិញ Sterling នៅថ្ងៃស្អែក ហើយ ប្រសិនបើខ្ញុំជាគាត់ ខ្ញុំនឹងមិនផ្លាស់ទៅ Barcelona ឬ Real Madrid ឡើយ។ Man Utd នឹងទិញយកគាត់៕
ប្រភព៖ metro
Bong I.T