បរទេស៖ យោងតាមអង្គការណាសាបានឲ្យដឹងថា សំណាកថ្មភពអង្គារចំនួនពីរដែលប្រមូលបានដោយរ៉ូបូត Perseverance អាចមានផ្ទុកភស្ដុតាងនៃពពុះទឹកពីបុរាណ។ សំណាកថ្មត្រូវបានគេរកឃើញ រួមបញ្ចូលទាំងសារធាតុរ៉ែអំបិល ដែលនឹងបើកបង្ហាញពីអាកាសធាតុពីបុរាណ និងទម្លាប់រស់នៅនៃភពអង្គារតាំងពីរាប់ពាន់លានឆ្នាំមុន ហើយអាចនឹងមានរក្សាទុកភស្ដុតាងនៃជីវិតពីបុរាណ ប្រសិនបើធ្លាប់កើតមាននៅលើភពក្រហមនេះ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សរ៉ូបូត Perseverance ទទួលជោគជ័យប្រមូលសំណាកថ្មចំនួនពីរជាលើកដំបូង នៅថ្ងៃទី៦និង៨ ខែកញ្ញា ដែលត្រូវបានគេដាក់ឈ្មោះឲ្យថា Montdenier និង Montagnac ដែលខួងយកចេញពីថ្មមួយមានឈ្មោះថា Rochette។ បច្ចុប្បន្ន រ៉ូបូតនេះកំពុងរុករកនៅតំបន់រណ្ដៅ Jezero ដែលជាទីតាំងបឹងបុរាណជាង៣ពាន់លានឆ្នាំមុន។ ដុំថ្មនៅក្នុងរណ្ដៅនេះអាចប្រាប់អ្នកវិទ្យាសាស្ត្រអំពីសកម្មភាពភ្នំភ្លើងបុរាណ នៅក្នុងតំបន់ ក៏ដូចជាបើមានទឹករយៈពេលយូរមកហើយ ឬបើមាននិងបាត់បង់ទៅវិញដោយសារតែអាកាសធាតុប្រែប្រួល។
សំណាកថ្មទាំងពីរនេះបង្ហាញថា ទឹកក្រោមដីទំនងជាមានវត្តមានយូរមកហើយ នៅក្នុងតំបន់នេះ។ ថ្ម Rochette គឺជាសិលាបាសាល់នៅក្នុងធម្មជាតិ មានន័យថាវាទំនងជាត្រូវកកើតឡើងដោយលំហូរកម្អែភ្នំភ្លើងពីបុរាណ។ ក្រាមរ៉ែនៅក្នុងសិលាដូចនេះអាចជួយអ្នកវិទ្យាសាស្ត្រ ទទួលបានការទាញយកកាលបរិច្ឆេទដ៏ត្រឹមត្រូវ និងពេលដែលថ្មនេះបានកកើត។ រ៉ែអំបិលនៅក្នុងថ្មគឺជាលទ្ធផលដែលត្រូវបានផ្លាស់ប្ដូរតាមពេលវេលា។ ពួកវាអាចកកើតឡើងមកបាន នៅពេលទឹកក្រោមដីអាចផ្លាស់ប្ដូរសារធាតុរ៉ែដើមនៅក្នុងថ្មកម្អែលភ្នំភ្លើង ឬនៅពេលទឹកហួតហើយនៅសល់អំបិលតាមក្រោយ។
ខណៈពេលដែលទឹកក្រោមដីអាចជាផ្នែកមួយនៃបឹង ដែលធ្លាប់គ្របដណ្ដប់នៅលើរណ្ដៅ Jezero និងដីសណ្ដទន្លេរបស់វា អ្នកវិទ្យាសាស្ត្រមិនទាន់ដឹងការពិតថា ទឹកបានធ្វើដំណើរឆ្លងកាត់ថ្ម បន្ទាប់ពីបឹងរីងអស់។ ប៉ុន្តែថ្មទាំងនេះបានផ្ដល់ក្រុមការងាររបស់រ៉ូបូត Perseverance នូវក្ដីសង្ឃឹម ដោយទឹកហាក់ដូចជាមានវត្តមានយូរល្មម ដើម្បីបង្កើតបរិស្ថានរស់នៅបាន ដែលជីវិតអតិសុខុមប្រាណបុរាណអាចលូតលាស់បាន។ សំណាកទាំងពីរនេះគឺជាសំណាកដំបូងក្នុងចំណោមថ្ម៣០ដុំ ដែលនឹងត្រូវប្រមូលដោយរ៉ូបូត និងចុងក្រោយត្រូវបញ្ជូនមកកាន់ផែនដី ដោយបេសកកម្មជាច្រើន ត្រូវបានគេហៅថា Mars Sample Return នៅឆ្នាំ២០៣១៕
ប្រភព: CNN