ពេលនេះ ប៉ូលិស ប្រើហិង្សាវាយនារីជិះម៉ូតូ បែកក្បាល ត្រូវបានឃាត់ខ្លួនហើយ ដោយមានដំណោះស្រាយបីចំណុច

រាជធានីភ្នំពេញ៖ នៅថ្ងៃទី០៩ ខែកញ្ញា​ ឆ្នាំ២០២១នេះ ប៉ូលិស ម៉ាត់ ពិសី ដែលបានបង្ករបួស្នាមលើនារីម្នាក់ បណ្តាលឱ្យបែកក្បាលហូរឈាមពេញខ្លួន កាលពីយប់មិញនេះ ត្រូវបានឃាត់ខ្លួន​ហើយ។ នេះបើតាមការបញ្ជាក់ឱ្យដឹងរបស់ស្នងការនគរបាលរាជធានីភ្នំពេញ។

ជាមួយគ្នានេះដែរ ដើម្បីដោះស្រាយបញ្ហានេះ ដោយអនុវត្តតាមបទបញ្ជារបស់ឯកឧត្តម​នាយឧត្តមសេនីយ៍​ សន្តិបណ្ឌិត​ នេត​ សាវឿន​ អគ្គស្នងការនគរបាលជាតិ​ និងឯកឧត្តម​ឧត្តមសេនីយ៍ឯក​ ស​ ថេត​ អគ្គស្នងការរង​ និងជាស្នងការនគរបាលរាជធានីភ្នំពេញ​។

ក្រុមការងារព័ត៌មាននិងប្រតិកម្មរហ័សនៃស្នងការដ្ឋាននគរបាលរាជធានីភ្នំពេញ​ទាក់ទងទៅនឹងករណីដែលបានកេីតឡេីងនៅយប់ថ្ងៃទី០៨ ខែកញ្ញា​ ឆ្នាំ២០២១​ នៅខណ្ឌ៧មករា​ បានចេញសេចក្តីបកស្រាយបំភ្លឺ និងផ្តល់នូវដោះស្រាយជូនភាគីទាំងសងខាងដូចខាងក្រោម៖

១.​ មន្ត្រីអន្តរាគមន៍ ដែលបានបង្កការរងរបួសដល់ស្ត្រីម្នាក់បណ្តាលឱ្យបែកក្បាលត្រូវបានឃាត់ខ្លួននៅអធិការដ្ឋាននគរបាលខណ្ឌ៧មករា​ បន្ទាប់ពីពេលកេីតហេតុ​រួច​។

២.​ សមត្ថកិច្ចនឹងឱ្យមន្ត្រីបង្ក​ ជួបជាមួយក្រុមគ្រួសារជនរងគ្រោះចរចារគ្នារឿងសំណង​ ថ្លៃព្យាបាល​ …បេីជនរងគ្រោះមិនសុខចិត្ត​ សមត្ថកិច្ចនឹងអនុវត្តបន្តដោយក៏សាងសំណុំរឿងបញ្ជូនទៅសាលាដំបូងរាជធានីភ្នំពេញ​ ដេីម្បីអនុវត្តបន្តតាមនីតិវិធីច្បាប់​។

៣.​ ប្រសិនបេីជនរងគ្រោះ ចរចារត្រូវគ្នាបញ្ចប់រឿងត្រឹមសំណង ​ មន្ត្រីនោះក៏នៅតែត្រូវអនុវត្តវិន័យកងកម្លាំងផងដែរ​។

៤.​ ចំពោះអ្នកបេីកបរល្មេីសច្បាប់​ បេីកបរគេចពីសមត្ថកិច្ចក៏នឹងត្រូវអនុវត្តតាមច្បាប់ផងដែរ​៕