ចក្រអង់គ្លេស៖ ថ្មីៗនេះ មានឃ្លីបវីដេអូមួយបង្ហាញឲ្យឃើញពីទង្វើមិនគួរគប្បីរបស់ប្រជាពលរដ្ឋចក្រភពអង់គ្លេស ដែលបានទៅបោះតង់ក្នុងការប្រគំតន្ត្រីប្រចាំឆ្នាំ Reading Festival និងទុកតង់ចោលរាប់ពាន់តង់ រួមជាមួយសំរាមរាប់តោនពាសវាលពាសកាលយ៉ាងឥតសណ្ដាប់ធ្នាប់ ក្រោយពីព្រឹត្តិការណ៍បីថ្ងៃត្រូវបានបញ្ចប់កាលពីថ្ងៃអាទិត្យសប្ដាហ៍មុន។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សតាមសម្ដីរបស់ក្រុមអ្នកការពារបរិស្ថានបាននិយាយថា តង់ក្នុងព្រឹត្តិការណ៍ដែលបោះចោល អាចបន្ថែមចំនួន៨៧៥តោនក្នុងការចាក់សំរាមនៅចក្រភពអង់គ្លេសជារៀងរាល់ឆ្នាំ ហើយវានឹងចំណាយពេលរហូតដល់ទៅ១០,០០០ឆ្នាំ ដើម្បីឲ្យវារលួយបាត់ទាំងស្រុងផងដែរ។ ទន្ទឺមនឹងនេះដែរ អ្នកគ្រប់គ្រងប្រកបដោយនិរន្តរភាពនៃព្រឹត្តិការណ៍បានបន្ថែមទៀតថា តង់ចំនួនមួយប៉ុណ្ណោះក្នុងចំណោមតង់ដប់ នឹងត្រូវបានយកទៅកែច្នៃឡើងវិញ ឬយកដោយអង្គការសប្បុរសធម៌។ ហើយតង់គឺជារបស់ដ៏អាក្រក់បំផុត ដែលគេព្យាយាមយកទៅកែច្នៃឡើងវិញ។ ជារៀងរាល់ឆ្នាំ ក្រោយពីព្រឹត្តិការណ៍បញ្ចប់ទៅបានពីរទៅបីថ្ងៃ ខាងក្រុមអ្នកជួយសង្គ្រោះ នឹងមកប្រមូលរបស់ដែលអាចយកបាន ដើម្បីបរិច្ចាគទៅកាន់អង្គការសប្បុរសធម៌គ្មានផ្ទះសម្បែង និងខាងផ្គត់ផ្គង់ស្បៀងអាហារជាដើម។
យ៉ាងណាមិញ ខាងសមាគមព្រឹត្តិការណ៍ឯករាជ្យ បានធ្វើការប៉ាន់ស្មានដែរថា តង់ចំនួន២៥០,០០០ ត្រូវបានទុកចោលនៅឯព្រឹត្តិការណ៍នានាទូទាំងចក្រភពអង់គ្លេស ដែលភាគច្រើនគេយកទៅចាក់ចោលនៅតំបន់គំនរសំរាម ហើយជុំវិញទង្វើរបស់ប្រជាពលរដ្ឋខាងលើនេះ ក៏ត្រូវបានគេចាត់ទុកថា ជាអាកប្បកិរិយាខ្ចិលច្រអូស និងគួរឲ្យស្អប់ខ្ពើមបំផុតផងដែរ៕
ប្រភព: Daily Mail
សូមទស្សនារូបភាពនិងវីដេអូខាងក្រោម៖