បរទេស៖ រ៉ូបូតលើភពអង្គាររបស់អង្គកាណាសា Perseverance កំពុងត្រៀមខ្លួនសម្រាប់ការប៉ុនប៉ងមួយផ្សេងទៀត ក្នុងប៉ុន្មានសប្ដាហ៍ខាងមុខនេះ ដើម្បីប្រមូលយកថ្មភពអង្គារ បន្ទាប់ពីការប៉ុនប៉ងលើកដំបូងរបស់ខ្លួន កាលពីដើមខែនេះ មិនបានសម្រេចដូចក្រុមវិស្វកររំពឹងទុក។ វិស្វករនិយាយថា ដៃប្រមូលយកសំណាករបស់រ៉ូបូតដំណើរការធម្មតា ប៉ុន្តែប្រអប់ផ្ទុកសំណាកបែរជាទទេទៅវិញ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សឥឡូវរ៉ូបូតនេះដែលជាមន្ទីរពិសោធន៍វិទ្យាសាស្ត្រចល័តវិលកង់ ដែលបានចុះចតនៅលើភពអង្គារតាំងពីខែកុម្ភៈ គ្រោងធ្វើដំណើរទៅកាន់ទីតាំងថ្មីមួយទៀត ឈ្មោះថា Citadelle សម្រាប់ការប្រមូលយកសំណាកថ្មជាលើកទី២។ លើកនេះដើម្បីកំណត់ថាសំណាកពិតជាប្រមូលយកបាន ក្រុមវិស្វករនឹងរង់ចាំទទួលរូបភាពនៃប្រអប់ដាក់សំណាកសិន មុននឹងដំណើរការទុកដាក់វាចូលទៅផ្នែកខាងក្នុងខ្លួនរ៉ូបូត។
សំណាកថ្មលើកដំបូងដែលរ៉ូបូត Perseverance បានខួងយក មិនមានភាពរឹងមាំដូចអ្នកវិទ្យាសាស្ត្រធ្លាប់គិតនោះទេ។ អ្វីដែលធ្លាប់ត្រូវបានគេគិតថាវាជាស្នូលថ្មរឹង បែរប្រែទៅជាកំទេចធូលីផុយស្រួយ ដែលបានហើរធ្លាក់ពីប្រអប់ដាក់សំណាកនៃរ៉ូបូត។ បន្ទាប់ពីរកឃើញថាប្រអប់ដាក់សំណាកគឺទទេ ក្រុមការងារនៃបេសកកម្មបានប្រើប្រាស់កាមេរ៉ារបស់រ៉ូបូត ដើម្បីវិភាគសំណល់នៃប្រហោងដែល Perseverance បានខួង។ បេសកកម្មរបស់ Perseverance គឺដើម្បីប្រមូលយកសំណាកនៃថ្មភពអង្គារចំនួន៣៥ ដើម្បីនាំយកពួកវាត្រឡប់មកកាន់ផែនដី នៅពេលណាមួយ ក្នុងទសវត្សរ៍ឆ្នាំ២០៣០៕
ប្រភព: The Verge