មកស្គាល់សត្វបុរាណប្លែកៗ ដែលទើបត្រូវបានគេរកឃើញ និងគាស់បង្ហាញឲ្យដឹង

អាមេរិក៖ ថនិកសត្វថ្មីចំនួន៣ប្រភេទត្រូវបានគេរកឃើញ ដោយផ្អែកលើផូស៊ីលដែលត្រូវបានប្រទះឃើញនៅតំបន់ដីសណ្ដ Great Divide នៃរដ្ឋ Wyoming។ ការវិភាគផូស៊ីលបង្ហាញថា សត្វទាំងនេះវិវត្តយ៉ាងឆាប់រហ័ស បន្ទាប់ពីដាយណូស័របានផុតពូជ ប្រហែល៦៦លានឆ្នាំមុន។ ថនិកសត្វសម័យបុរេប្រវត្តិនេះបានរស់នៅទ្វីបអាមេរិកខាងជើង ៣២៨,០០០ឆ្នាំបន្ទាប់ពីដាយណូស័របាត់វត្តមានពីផែនដី។

ក្រុមអ្នកជំនាញផ្នែកសត្វពីបុរាណបានប្រើឆ្អឹងថ្គាមខាងក្រោមនិងធ្មេញ ដើម្បីបង្ហាញពីព័ត៌មានលម្អិតបន្ថែម អំពីថនិកសត្វដែលជាប្រភេទ condylarths ដែលជាបុព្វបុរសរបស់ថនិកសត្វសម័យបច្ចុប្បន្ន ដូចជាសេះ ដំរីទឹក គោ និងដំរីជាដើម។ សត្វថនិកសត្វដំបូងៗដែលរស់នៅក្បែរដាយណូស័រ ហើយអាចរស់រានមានជីវិតពីការផុតពូជរបស់វា មានទំហំតូចបន្តិច ជាធម្មតាទំហំប៉ុនសត្វកណ្ដុរ។ ប៉ុន្តែថនិកសត្វទើបរកឃើញថ្មីនេះ មានទំហំធំជាងបន្តិច។

ក្នុងចំណោមសត្វថ្មីទាំងនេះ សត្វ Beornus honeyi មានទំហំធំជាងគេ ប៉ុនសត្វឆ្មានៅក្នុងផ្ទះពេលបច្ចុប្បន្ន។ ឯប្រភេទសត្វពីរទៀត គឺ Miniconus jeanninae មានរាងប៉ុនសត្វ ring-tailed cat និងសត្វចុងក្រោយ Conacodon hettingeri មានទំហំចន្លោះរវាងសត្វពីរខាងដើមនេះ។

ធ្មេញរបស់ពូកវាជួយឲ្យវា អាចទំពារសាច់និងរុក្ខជាតិដែលពិបាក ប៉ុន្តែពួកវាក៏អាចជាប្រភេទសត្វស៊ីរុក្ខជាតិជាអាហារផងដែរ។ ផូស៊ីលដែលត្រូវបានប្រើក្នុងការស្រាវជ្រាវនេះ បានប្រមូលនៅចន្លោះឆ្នាំ២០០១និង២០១១ នៅតំបន់ដីណ្ដរ Great Divide ក្នុងវាលខ្សាច់ក្រមរបស់រដ្ឋ Wyoming ដោយអ្នកជំនាញផ្នែកសត្វពីបុរាណ៕

ប្រភព: CNN