ភ្នំពេញ៖ លោក ជា រតនាដែលជាអភិបាលធនាគារសហពាណិជ្ជបានប្រាប់កម្ពុជាថ្មីនៅព្រឹកថ្ងៃទី១២ ខែ មករា ឆ្នាំ ២០១២នេះថា រូបលោកមិនមានប្អូនប្រុសបង្កើតឈ្មោះ ជា រតនៈ ដែលបានផ្ទុះអាវុធធ្វើឲ្យមានមនុស្សស្លាប់ដូចការចុះផ្សាយរបស់កាសែតភ្នំពេញប៉ុស្ដិ៍ចេញផ្សាយឆ្នាំទី២លេខ ៥៩៦ ចេញផ្សាយថ្ងៃពុធទី ១១ ខែ មករា ឆ្នាំ២០១២ ដែលមានចំណងជើងថា«ប្អូនប្រុសសេដ្ឋីម្ចាស់ធនាគារមួយជាប់ចោទពីបទឃាតកម្ម»នោះទេ។លោក ជារតនា បានថ្លែងថាកាសែតភ្នំពេញប៉ុស្ដិ៍ភាសាខ្មែរចុះផ្សាយបំភ្លឺក្នុងទំព័រទី៦ ឆ្នាំទី២លេខ៥៩៧ថ្ងៃព្រហស្បត្តិ៍ទី១២ ខែ មករា ឆ្នាំ ២០១២នេះខ្លឹមសារនៃការបំភ្លឺមិនបានក្បោះក្បាយដូចដែលបានចេញ ផ្សាយព័ត៌មានមិនពិត។
លោក កៃគឹមសុង នាយកកាសែតភ្នំពេញប៉ុស្ដិ៍បានប្រាប់កម្ពុជាថ្មីកាលពីព្រឹកនេះថាលោកមានការសោកស្ដាយចំពោះការផ្ដល់ព័ត៌មានពីប្រភពមន្ត្រីប៉ូលិសដែលមិនមានមូលដ្ឋានច្បាស់លាស់នាំឲ្យប៉ះពាល់ដល់កិត្តិយសរបស់លោក ឧកញ៉ា ជារតនា អភិបាលធនាគារសហពាណិជ្ជ។ លោកក៏បានចេញផ្សាយសេចក្ដីបំភ្លឺនៅលើទំព័រសារព័ត៌មានរួចហើយដែរ។ ប៉ុន្តែចំពោះលោកឧកញ៉ាជារតនាវិញមិនទាន់អាចទទួលយកបានចំពោះការបំភ្លឺរបស់កាសែតភ្នំពេញប៉ុស្ដិ៍នោះនៅឡើយទេ។
គួរបញ្ជាក់ថានៅក្នុងអត្ថបទរបស់កាសែតភ្នំពេញប៉ុស្ដិ៍ដែលបានផ្សាយថាប្អូនប្រុសសេដ្ឋីម្នាក់ជាម្ចាស់ធនាគារកម្ពុជាពាណិជ្ជត្រូវបានបញ្ជូនទៅសាលាដំបូងរាជធានីភ្នំពេញពាក់ព័ន្ធនឹងបទចោទប្រកាន់ករណីបាញ់សម្លាប់បុរសវ័យក្មេងម្នាក់កាលពីសប្ដាហ៍មុន។ ប៉ុន្តែប្រភពពីមន្ត្រីធនាគារជាតិនៃកម្ពុជាបានឲ្យដឹងថាធនាគារកម្ពុជាពាណិជ្ជពុំមានម្ចាស់ភាគហ៊ុនឈ្មោះជារតនាទេ ហើយ លោក ឧកញ៉ាជារតនាក៏មិនមែនជាសេដ្ឋីធនាគារនោះដែរ។
លោក ឧកញ៉ាជារតនាបានចេញមុខបដិសេធ នឹងការចុះផ្សាយនោះថាគ្មានមូលដ្ឋានច្បាស់លាស់ផ្ទុយពីការពិតជាហេតុធ្វើឲ្យប៉ះពាល់ដល់កិត្តិយស សេចក្ដីថ្លៃថ្នូរយ៉ាងខ្លាំង។ ដូច្នេះកាសែតភ្នំពេញប៉ុស្ដិ៍ត្រូវតែធ្វើការកែតម្រូវនិងសុំទោសជាសាធារណៈចំពោះការចុះផ្សាយនោះឡើង វិញ។ លោកជារតនាបានបញ្ជាក់ប្រាប់កម្ពុជាថ្មីទៀតថារូបលោក មិនមានប្អូនប្រុសឈ្មោះជា រតនៈដែលបានបាញ់សម្លាប់គេនោះទេ វាជាការបំភ្លើសព័ត៌មានទាំងស្រុង ហើយកាសែតភ្នំពេញប៉ុស្តិ៍បានចុះផ្សាយមិនគោរពតាមក្រមសីលធម៌វិជ្ជាជីវៈជាអ្នកសារព័ត៌មាន។
គួររំលឹកថាឈ្មោះជារតនៈកាលពីថ្ងៃទី ៥ ខែ មករា ឆ្នាំ ២០១២ បានផ្ទុះអាវុធជាច្រើនគ្រាប់នៅក្នុងសង្កាត់ទំនប់ទឹក ខណ្ឌចំការមន រាជធានីភ្នំពេញ ត្រូវចំយុវជនម្នាក់បណ្ដាលឲ្យស្លាប់បាត់បង់ជីវិតរយៈពេលប្រហែលកន្លះម៉ោងក្រោយមក ហើយជននេះត្រូវបានឃាត់ខ្លួនអនុវត្តន៍តាមនីតិវិធីរបស់តុលាការ។ ប៉ុន្តែ អ្វីដែលមិនពាក់ព័ន្ធនោះគឺឈ្មោះជា រតនៈជាជនដៃដល់មិនមែនជាសាច់ញាតិបងប្អូនជាមួយលោកឧកញ៉ា ជា រតនាអ្វីបន្តិចសោះ មិនដូចការចុះផ្សាយចោទប្រកាន់ទាំងគ្មានមូលដ្ឋានច្បាស់លាស់របស់កាសែតភ្នំពេញប៉ុស្តិ៍ផ្សាយបង្កាច់បង្ខូចកេរ្ដិ៍ឈ្មោះរបស់លោកនោះទេ។
លោកជា រតនាបានប្រាប់កម្ពុជាថ្មីទៀតថា លោកនឹងពិចារណាក្នុងការប្ដឹងកាសែតភ្នំពេញប៉ុស្ដិ៍ទៅតុលាការពីបទបរិហារកេរ្តិ៍និងផ្សាយព័ត៌មានមិនពិតធ្វើឲ្យប៉ះពាល់ដល់កិត្តិយស សេចក្ដីថ្លៃថ្នូរ៕
ដកស្រង់ពីគេហទំព័រ កម្ពុជាថ្មី
សូមមើលអត្ថបទ Phnom Penh Post ដោយចុចលើ http://khmerload.com/news.php?id=152
សូមបងប្អូនជួយចុច Add a comment ដើម្បីផ្តល់ជាមតិ និងជួយ Share នៅលើ Facebook របស់អ្នក។សូមអរគុណ ខ្មែរស្រលាញ់ខ្មែរ។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
