ចុម! បុរសម្នាក់នេះ រត់ចេញពីកន្លែងហាត់ប្រាណទាំងភ័យ ក្រោយពីខ្មោចចាប់លើកជើងម្ខាងនិងអូស (មានវីដេអូ)

បរទេស៖ មហាជនអ្នកប្រើប្រាស់បណ្ដាញសង្គម បានសម្ដែងការភ្ញាក់ផ្អើល ជុំវិញវីដេអូឃ្លីបមួយ ដែលថតចេញពីកាមេរ៉ាសុវត្ថិភាព និងបង្ហោះចែកចាយនូវសកម្មភាព បុរសម្នាក់ ត្រូវខ្មោចលងនៅកន្លែងហាត់ប្រាណមួយកន្លែង។ ហើយវីដេអូឃ្លីបនេះ ត្រូវបានថតឡើងនៅក្នុងប្រទេសកូឡុំប៊ី ដោយទទួលបានការចាប់អារម្មណ៍យ៉ាងខ្លាំង និងមានអ្នកចុចចូលទស្សនាដល់ទៅជាង១១លានដងឯណោះនៅលើបណ្ដាញសង្គម Tik Tok។

ជាក់ស្ដែង តាមរយៈ​វីដេអូឃ្លីបចំនួនពីរ បង្ហាញឲ្យឃើញថា បុរសរូបនោះ បានរៀបចំបម្រុងនឹងហាត់ប្រាណ ដោយការកម្ដៅសាច់ដុំជាមុនសិន ដែលទន្ទឹមនឹងនោះដែរ មានឧបករណ៍ហាត់ប្រាណមួយគ្រឿង ធ្វើចលនាដោយខ្លួនឯង តែគាត់មិនបានឃើញឡើយ។ បន្ទាប់មកទៀត មានបាល់មួយរំកិលដោយខ្លួនឯងទៀត ទាំងដែលមុនហ្នឹងវានៅស្ងៀមមួយកន្លែងសុខៗសោះ។ ឃើញដូច្នេះ គាត់ហាក់មានអារម្មណ៍មិនសូវស្រួល ក៏ប្រមូលអីវ៉ាន់របស់គាត់ និងរត់ចេញ ក៏ស្រាប់តែមានអ្វីម៉្យាងចាប់បំបះជើងរបស់គាត់ម្ខាងឡើងទៅលើ ដែលបណ្ដាលឲ្យគាត់ដួល និងអូសតែម្ដង។ មិនបង្អង់យូរ គាត់ក៏ស្ទុះក្រោកឡើង និងរត់ចុះទៅជាន់ខាងក្រោមនៃកន្លែងហាត់ប្រាណ ទាំងភ័យខ្លាច ហើយលុះពេលទៅដល់កន្លែងផ្ដល់ព័ត៌មាន គាត់បានព្យាយាមរៀបរាប់ប្រាប់ពីរឿងរ៉ាវដែលបានកើតឡើង ទៅកាន់បុគ្គលិកម្នាក់ឲ្យដឹងផងដែរ។

យ៉ាងណាមិញ ជុំវិញរឿងរ៉ាវខាងលើនេះ មិនទាន់មានការរាយការណ៍បន្ថែមឡើយ តែទន្ទឹមនឹងនេះដែរ ក៏មានអ្នកខ្លះជឿថាបុរសរូបនោះត្រូវបានខ្មោចលងពិតមែន ហើយអ្នកខ្លះទៀតគិតថាវាអាចគ្រាន់តែជាការសម្ដែងប៉ុណ្ណោះ៕

ប្រភព: Ladbible 

សូមទស្សនារូបភាពនិងវីដេអូខាងក្រោម៖