កំណត់ត្រាថ្មី!​ ថៃរកឃើញអ្នកឆ្លងកូវីដ១៩ ក្នុងចំនួនដ៏ច្រើនបំផុត ក្នុងរយៈពេល ២៤ម៉ោងចុងក្រោយ

បាងកក៖ ក្រសួងសុខាភិបាលថៃនៅព្រឹកថ្ងៃសៅរ៍នេះ បាន​កត់ត្រាពីករណីអ្នកឆ្លងកូវីដ១៩ ក្នុងចំនួនដ៏ច្រើនបំផុត គឺរហូតដល់ ១៨,៩១២នាក់ និងមានអ្នកស្លាប់ ១៧៨នាក់ ក្នុងរយៈពេល ២៤ ម៉ោងចុងក្រោយនេះ។ នេះបើតាមប្រភពព័ត៌មាន Bangkok Post។

ក្នុងចំណោម អ្នកឆ្លងថ្មីទាំង​អស់នេះ មាន ១៨,១០២នាក់ ជាប្រជាពលរដ្ឋទូទៅ និង ​៨១០នាក់ ជាអ្នកទោសក្នុងពន្ធនាគារ។​ ហើយនៅថ្ងៃដដែល មានអ្នកជំងឺកូវីដ១៩ ចំនួន ​១០,៧៥០នាក់ ​បានជាសះស្បើយ និងត្រូវបាន​អនុញ្ញាតឱ្យចាកចេញពីមន្ទីរពេទ្យ។

​បើតាមប្រភព worldometers ក៏បានឱ្យដឹងដែរថា គិតមកទល់ពេលនេះ តួលេខអ្នកឆ្លងកូវីដ១៩ ក្នុងប្រទេសថៃ បានបន្តកើនឡើងដល់ ៥៩៧,២៨៧នាក់ ស្លាប់ ៤,៨៥៧នាក់ ខណៈអ្នកជំងឺប្រមាណ ២០០,៥១០នាក់ផ្សេងទៀត កំពុងសម្រាកព្យាបាលនៅតាមមន្ទីរពេទ្យ៕