អុញ! បានជិះទៅទីអវកាសជាមួយមេ Amazon ហើយ តែយុវជននេះសារភាពត្រង់ៗថា មិនធ្លាប់ទិញទំនិញពី Amazon ទេ

បរទេស៖ ក្មេងជំទង់ជនជាតិហូឡង់ដែលក្លាយជាអ្នកធ្វើដំណើរទៅទីអវកាសក្មេងជាងគេបំផុតនៅលើពិភពលោក បានធ្វើឲ្យមហាសេដ្ឋីប្រាក់ពាន់លាន លោក Jeff Bezos មានការភ្ញាក់ផ្អើល នៅពេលហោះហើរ ដោយបានប្រាប់គាត់ថា ខ្លួនមិនដែលបញ្ជាទិញទំនិញអ្វី នៅលើគេហទំព័រ Amazon ទេ។

និស្សិតរូបវិទ្យាអាយុ១៨ឆ្នាំ ឈ្មោះ Oliver Daemen ក៏បានរួមដំណើរជាមួយបងប្រុសរបស់មេ Amazon ឈ្មោះ Mark Bezos និងលោកយាយអាយុ៨២ឆ្នាំ ឈ្មោះ Wally Funk ដែលជាមនុស្សមានវ័យចំណាស់ជាងគេ បានធ្វើដំណើរទៅទីអវកាសផងដែរ។ ការធ្វើដំណើរនេះបានប្រើពេលត្រឹមតែ១០នាទីប៉ុណ្ណោះ នៅខាងលើបរិយាកាសរបស់ផែនដី។

យុវជន Daemen បានប្រាប់សារព័ត៌មានរ៉យទ័រនៅក្នុងបទសម្ភាសន៍មួយ នៅឯព្រលានយន្តហោះ Amsterdam's Schiphol Airport ថា៖ «ខ្ញុំបានប្រាប់លោក Jeff ដូចជា ខ្ញុំពិតជាមិនដែលបានទិញទំនិញពីក្រុមហ៊ុន Amazon ទេ»។ យុវជន Daemen ធ្លាប់បានសុបិនអំពីការធ្វើដំណើរទៅទីអវកាស ចាប់តាំងពីគាត់នៅក្មេង៕

ប្រភព: Reuters