អ្នកវិទ្យាសាស្ត្របានរកឃើញ ផូស៊ីលនៃសត្វមានអាយុកាលចំណាស់បំផុត នៅលើផែនដី

កាណាដា៖ ការជ្រាវថ្មីមួយបានបង្ហាញថា ជីវិតសត្វប្រហែលជាមានវត្តមាន នៅក្នុងមហាសមុទ្រនៅលើផែនដី កាលពី៨៩០លានឆ្នាំមុន។ ផូស៊ីលដែលត្រូវបានរកឃើញថ្មីៗនេះ ជាអេប៉ុងបុរាណ អាចជាសាកសពដំបូងបង្អស់នៃរាងកាយសត្វ និងមុនអាយុកាល៣៥០លានឆ្នាំនៃផូស៊ីលសត្វអេប៉ុងសមុទ្រផ្សេងទៀត។

អ្នកស្រី Elizabeth Turner សាស្ត្រាចារ្យផ្នែកជីវិតពីបុរាណនិងភូគព្ភសាស្ត្រសេឌីម៉ង់ទែរ នៅសាកលវិទ្យាល័យ Laurentian University ក្នុងខេត្ត Ontario បានរកឃើញនូវអ្វី ដែលគាត់ជឿជាក់ថា អាចជាសណ្ឋានផូស៊ីលនៃអេប៉ុង ដែលធ្លាប់មាននៅក្នុងថ្មប៉ប្រះទឹក កាលពីរាប់លានឆ្នាំមុន។ ពួកវាត្រូវបានរកឃើញ នៅក្នុងសំណាកថ្ម នៅភាគពាយព្យ ប្រទេសកាណាដា។

គេបានដឹងតិចតួចអំពីថ្ងៃដំបូងនៃជីវិតសត្វនៅលើផែនដី ព្រោះកំណត់ត្រាផូស៊ីលមិនសូវមាន។ ខណៈពេលដែលអ្នកវិទ្យាសាស្ត្របានប្រើភស្ដុតាងហ្សែន ដើម្បីបង្ហាញថាអេប៉ុងសមុទ្របានបង្ហាញវត្តមាន ចន្លោះពី៥៤១លាននិង១,០០០លានឆ្នាំមុន។ អ្វីដែលអ្នកស្រីបានរកឃើញនៅក្នុងសំណាកថ្មបុរាណ គឺជាសណ្ឋានផូស៊ីលដែលស្រដៀងនឹងឆ្អឹងនៃអេប៉ុងស្នែងបច្ចុប្បន្ន៕

ប្រភព: CNN