ម្នាក់ទៀតហើយ! កីឡាករ Real Madrid រូបនេះកំពុងពិចារណាផ្ទេរមកលេងនៅ Arsenal

អេស្ប៉ាញ៖ ខ្សែបម្រើ Martin Odegaard កំពុងពិចារណាចាកចេញពីក្លិប Real Madrid ដើម្បីផ្ទេរទៅលេងនៅក្លិបកាំភ្លើងធំ Arsenal បន្ទាប់ពីចំណាយពេលខ្ចីជើងពាក់កណ្ដាលរដូវកាលនៅទឹកដី Emirates កាលពីរដូវកាលមុន។

Odegaard បានបង្ហាញទម្រង់លេងយ៉ាងល្អក្រោមការដឹកនាំរបស់លោកគ្រូបង្វឹក Mikel Arteta ហើយគេក៏អាចចូលលេងបានញឹកញាប់ផងដែរ ខណៈដែលនៅ Real Madrid គឺ កីឡាករសញ្ជាតិន័រវេសរូបនេះពុំសូវមានឱកាសបានចូលលេងនោះឡើយ។

Arsenal ចង់ទិញយក Odegaard ផ្ដាច់ឬសុំខ្ចីជើងមួយរដូវកាលទៀតខ្លាំងណាស់ប៉ុន្តែ Real Madrid បដិសេធដាច់ខាតថាមិនឲ្យតារាវ័យក្មេងរូបនេះចាកចេញទេ។

ដូច្នេះហើយទើប Martin Odegaard បានវិលត្រឡប់ទៅលេងនៅ Real Madrid វិញដោយគេបានចូលហ្វឹកហាត់មុនបើករដូវកាលជាមួយកីឡាករដទៃទៀតដែរ។យ៉ាងណាមិញយោងតាម Cadena SER គឺ ខ្សែបម្រើវ័យ២២ឆ្នាំរូបនេះចូលហ្វឹកហាត់ទាំងគ្មានព្រលឹងក្នុងខ្លួននិងពុំសូវមានទំនាក់ទំនងជាមួយមិត្តរួមក្រុមឡើយ។

សារព័ត៌មាននេះក៏បានបន្តទៀតថា Odegaard មិនសប្បាយចិត្តមួយរយភាគរយទេ និងចង់វិលត្រឡប់ទៅលេងនៅ Arsenal វិញបើសិនអាចមានជម្រើសណាមួយប៉ុន្តែគេមិនដឹងថា Real Madrid នឹងព្រមបើកផ្លូវឲ្យគេចាកចេញឬយ៉ាងណានោះឡើយ៕

ប្រភព៖ metro