ទើបដឹង! Varane ស្ថិតក្នុងចំណោមកីឡាករ៣រូបទៀត ដែល R.Madrid លក់ចេញបានថ្លៃបំផុត

អង់គ្លេស៖ ពិតណាស់ Rapheal Varane បានផ្ទេរទៅកាន់ក្លិបបិសាចក្រហម ​Manchester United ជាផ្លូវការ ក្នុងតម្លៃប្រមាណ៥០លានអឺរ៉ូ (ប្រមាណ៥៩ដុល្លារអាមេរិក) ដែលបានធ្វើឲ្យខ្សែការពារសញ្ជាតិបារាំងរូបនេះ ក្លាយជាកីឡាករថ្លៃលំដាប់ទី៤ ដែលក្លិប Real Madrid បានលក់ចេញ។

ចំពោះកីឡាករថ្លៃៗចំនួន៣រូបផ្សេងទៀតរួមមាន Cristiano Ronaldo លក់ឲ្យក្លិប Juventus ក្នុងឆ្នាំ ២០១៨ ក្នុងតម្លៃ ១០៥លានអឺរ៉ូ (ឬប្រមាណ ១២៤លានដុល្លារអាមេរិក), Alvaro Morata លក់ឲ្យក្លិប Chelsea ក្នុងឆ្នាំ ២០១៧ ក្នុងតម្លៃ ៨០លានអឺរ៉ូ (ឬប្រមាណ ៩៥លានដុល្លារអាមេរិក) និង Angel di Maria លក់ឲ្យក្លិប Manchester United ក្នុងឆ្នាំ ២០១៤ ក្នុងតម្លៃ ៧៥លានអឺរ៉ូ (ឬប្រមាណ ៨៨លានដុល្លារអាមេរិក)។

គួររម្លឹកថា Varane បច្ចុប្បន្នវ័យ២៨ឆ្នាំ បានមកចូលរួមជាមួយក្រុមស្ដេចស Real Madrid តាំងពីមានវ័យ១៨ឆ្នាំមកម្ល៉េះ។ មកទល់ពេលនេះ រូបគេបានចំណាយពេលនៅទីក្រុង Madrid ១០ឆ្នាំហើយ និងបានជួយក្លិបឈ្នះពានរង្វាន់ជាច្រើនហូរហែផងដែរ៕

ប្រភព៖ marca