ឈប់យល់ច្រឡំទៅ! Kepa បកស្រាយការពិតដែលគេមិនព្រមប្ដូរចេញកាលប៉ះ Man City ជំនាន់ Sarri នៅដឹកនាំ

កាលណោះ Man City កំពុងមានប្រៀបក្នុងការប្រកួតហើយសុខៗខ្ញុំក៏មានអារម្មណ៍ឈឺជើងតិចតួច បន្ទាប់មកខ្ញុំឃើញលោក Sarri ឲ្យ Willy ទៅកំដៅសាច់ដុំ។ ខ្ញុំមិនដឹងថាគិតខុសឬត្រូវទេតែ ខ្ញុំព្យាយាមបញ្ជូនសញ្ញាថាខ្ញុំមិនអីទេ ខ្ញុំមិនបានរងរបួសទេ ប៉ុន្តែពួកយើងប្រកួតនៅ Wembley ដែលមានអ្នកគាំទ្រ ៨ម៉ឺននាក់ ទើប Sarri មិនបានយល់ពីអ្វីដែលខ្ញុំនិយាយ។ នៅពេលដែលអាជ្ញាកណ្ដាលក្រៅទីលានលើកស្លាកប្ដូរខ្ញុំចេញ គឺខ្ញុំគួរតែចេញ ហើយខ្ញុំសុំទោសដែលមិនបានចាកចេញ។ ខ្ញុំពិតជាសុំទោសគ្រប់គ្នាដែលពាក់ព័ន្ធ ជាពិសេសទៅលោក Maurizio Sarri និង Willy ដែលជាមិត្តរួមក្រុមដ៏ល្អម្នាក់ និងមិត្តរួមក្រុមផ្សេងព្រមទាំងអ្នកគាំទ្រដែរ។ បន្ទាប់មកខ្ញុំក៏បាននិយាយជាមួយលោកគ្រូបង្វឹកពីស្ថានការណ៍ ​​​មួយនោះហើយពួកយើងក៏បានយល់ពីគ្នា។ បន្ទាប់មកខ្ញុំក៏មិនបានចូលលេងមួយប្រកួតតែក្រោយមក ខ្ញុំបានចូលលេងវិញតាមធម្មតា។ ប៉ុន្តែក្រោយមក ខ្ញុំបានឆែកទូរស័ព្ទមើលព័ត៌មានបន្ទាប់ពីការប្រកួតចប់ ខ្ញុំដឹងភ្លាមថាខ្ញុំល្បីពេញពិភពលោកទៅហើយ។ មនុស្សទាំងនោះបានបង្ហោះរូបនោះនិងគិតថាខ្ញុំមិនគោរពលោកគ្រូ Sarri ។ ខ្ញុំត្រូវគេយល់ច្រឡំ កាលណោះខ្ញុំគ្រាន់តែព្យាយាមប្រាប់លោកគ្រូថាខ្ញុំមិនឈឺអីទេ ខ្ញុំព្យាយាមពន្យល់តែមិនអាច។ ប៉ុន្តែខ្ញុំនៅមានទំនាក់ទំនងល្អជាមួយ Maurizio ហើយលើកក្រោយបើជួបស្ថានការណ៍បែបនេះទៀត ខ្ញុំដឹងហើយថាត្រូវធ្វើអី៕