ចប់ហើយ! មិនទាន់បានលេងមួយប្រកួតផង ឥឡូវកីឡាករចំណូលថ្មីរបស់ PSG រូបនេះរបួសបាត់

បរទេស៖ កីឡាករ Sergio Ramos បានរងរបួសនៅផ្នែកកំភួនជើងខាងឆ្វេងជាមួយក្រុម Paris Saint-Germain ហើយខ្សែការពារសញ្ជាតិ អេស្ប៉ាញ នឹងខកខានមិនបានចូលហ្វឹកហាត់រហូតដល់សប្តាហ៍បន្ទាប់។

តួយ៉ាង អតីតប្រធានក្រុមរបស់ Real Madrid គឺមិនបានដាក់បញ្ចូលទៅក្នុងបញ្ជីឈ្មោះរបស់អ្នកចាត់ការលោក Mauricio Pochettino នោះទេ សម្រាប់ការប្រកួតលក្ខណៈមិត្តភាពមុនបើករដូវកាលលើកទី ៥ រវាងក្រុម PSG ទល់នឹងក្រុម Sevilla នៅទឹកដីប្រទេស ព័រទុយកាល់ កាលពីម្សិលមិញនេះ។

ក្នុងនោះ PSG បានបង្ហើបឱ្យដឹងថា របួសរបស់ Ramos បានកើតឡើងនៅពេលដែលរដូវកាល ២០២០-២០២១ បានបញ្ចប់ ហើយគាត់គឺនៅមានបញ្ហាផ្នែករាងកាយខ្លះៗ, ទន្ទឹមនឹងនេះគាត់កំពុងតែព្យាយាមហ្វឹកហាត់ដើម្បីឱ្យត្រឡប់មកកាន់សភាពដើមឡើងវិញ៕

ប្រភព៖ Marca