Ronaldo បានមកដល់ទីក្រុង Turin វិញហើយ ខណៈអ្នកគាំទ្រឈរត្រៀបត្រាចាំទទួលយ៉ាងកក់ក្តៅ (មានវីដេអូ)

បរទេស៖ ខ្សែប្រយុទ្ធរបស់ក្រុម Juventus កីឡាករ Cristiano Ronaldo បានត្រឡប់មកកាន់ទីក្រុង Turin វិញហើយ ដើម្បីចូលរួមហ្វឹកហាត់ត្រៀមបើករដូវកាលថ្មី។

ជាការពិតណាស់ នារយៈពេលប៉ុន្មានសប្តាហ៍ចុងក្រោយនេះ អនាគតរបស់ខ្សែប្រយុទ្ធសញ្ជាតិ ព័រទុយហ្កាល់ ត្រូវបានក្លាយជាប្រធានបទក្តៅមួយ បន្ទាប់ពីលោកនៅសល់កុងត្រាជាមួយក្រុម សេះបង្កង់ត្រឹមតែមួយរដូវកាលទៀតតែប៉ុណ្ណោះ ប៉ុន្តែជាក់ស្តែងមកដល់ពេលនេះហើយលោកនៅមិនទាន់យល់ព្រមលើការបន្តកុងត្រាថ្មីនៅឡើយទេ។

ជាមួយគ្នានេះ តែងតែមានពាក្យចចាមអារ៉ាមអំពីទំនាក់ទំនងរបស់ខ្សែប្រយុទ្ធឆ្នើមខាងលើ ជាមួយក្លិបមួយចំនួនដែលចង់បានលោក, ក្នុងនោះមានក្លិប Paris Saint-Germain និង អតីតក្លិបចាស់ Manchester United ជាដើម។ ទោះបីជាយ៉ាងណាក៏ដោយ លោកត្រូវបានគេជឿជាក់ថា នឹងបន្តស្នាក់នៅជាមួយក្រុម សេះបង្កង់ជាបន្តទៀតផងដែរ។

កាលពីថ្ងៃ អាទិត្យ កន្លងទៅខ្សែប្រយុទ្ធវ័យ ៣៦ ឆ្នាំបានធ្វើមកដល់ទីក្រុង Turin វិញហើយ បន្ទាប់ពីឈប់សម្រាក ក្រោយបញ្ចប់ព្រឹត្តិការណ៍ Euro ២០២០ ជាមួយក្រុមជម្រើសជាតិ ព័រទុយកាល់, ទន្ទឹមនឹងនេះ អ្នកគាំទ្របានឈរចាំការត្រឡប់វិលវិញរបស់ Ronaldo ហើយពួកគេបានបង្ហាញការស្វាគមន៍យ៉ាងកក់ក្តៅ ដែលនេះសបញ្ជាក់ឱ្យឃើញពីការគាំទ្រយ៉ាងស្មោះស្មគ័្ររបស់ពួកគេ៕

សូមទស្សនាវីដេអូខាងក្រោម៖