​តារាកំប្លែងកូរ៉េខាងត្បូង Park Soo Hong ប្តឹងបងប្អូនថ្លៃ ក្រោយមានជម្លោះហិរញ្ញវត្ថុ​

កូរ៉េខាងត្បូង៖​ តារាកំប្លែង Park Soo Hong បានចាត់វិធានការតាមផ្លូវច្បាប់លើបងប្រុសនិងប្អូនថ្លៃរបស់លោក បន្ទាប់ពីមានជម្លោះហិរញ្ញវត្ថុជុំវិញរឿងប្រាក់ចំណូលរបស់តារារូបនេះ។ នេះបើតាមការចុះផ្សាយរបស់សារព័ត៍មាន Allkpop។

កាលពីថ្មីៗនេះ មានព័ត៍មានរាយការណ៍ថា បងប្រុសរបស់ Park Soo Hong បានបោកប្រាស់លោកពីការរកចំណូលពេញមួយជីវិតរបស់លោកហើយ ក្រោយមកមេធាវីរបស់តារាកំប្លែងរូបនេះ ក៏បាននិយាយពីស្ថានភាពនេះ។

នៅថ្ងៃទី ២៤ ខែកក្កដានេះ ប្រព័ន្ធផ្សព្វផ្សាយព័ត៌មានបានបង្ហាញថាតារាកំប្លែងរូបនេះ បានដាក់ពាក្យបណ្តឹងរដ្ឋប្បវេណីប្រឆាំងនឹងបងប្រុសនិងប្អូនថ្លៃរបស់លោក​ កាលពីថ្ងៃទី ២២ ខែមិថុនា។

ដំបូងគាត់បានប្តឹងទាមទារសំណងចំនួន ៨,៦ ពាន់លានវ៉ុន ស្មើរប្រមាណ ៧,៤ លានដុល្លារអាមេរិក ប៉ុន្តែក្រោយមកនៅថ្ងៃទី ១៦ ខែកក្កដាតំណាងស្របច្បាប់របស់លោកបានបង្កើនចំនួនការខូចខាតដល់ ១១,៦ ពាន់លានវ៉ុន ប្រហែល ១០ លានដុល្លារអាមេរិក រួមជាមួយនឹងការធ្វើវិសោធនកម្មទាមទារ។

ដោយឡែក មេធាវីរបស់ Park Soo Hong បានថ្លែងថា នៅពេលស៊ើបអង្កេតករណីនេះយើងបានរកឃើញការខូចខាតបន្ថែម ដូច្នេះយើងបានបន្ថែមការខូចខាតដោយពង្រីកការគ្របដណ្តប់លើពាក្យបណ្តឹង ។

គួររំលឹកថា Park Soo Hong បានដាក់ញត្តិសុំបញ្ឈប់ការលក់អចលនទ្រព្យនៅថ្ងៃទី ២៨ ខែមិថុនាហើយតុលាការបានយល់ព្រមលើញត្តិនោះ។ នៅថ្ងៃទី ១៩ ខែកក្កដាតុលាការបានលះបង់សិទ្ធិក្នុងការលក់អចលនទ្រព្យទាំងអស់ក្រោមឈ្មោះបងប្រុសនិងប្អូនថ្លៃរបស់ Park Soo Hong ដោយផ្អែកលើញត្តិរបស់លោកផងដែរ។

ទាក់ទិននឹងបញ្ហានេះ Park Soo Hong បានប្តឹងបងប្រុសនិងប្អូនថ្លៃរបស់របស់លោក ពីបទកិបកេងប្រាក់៕