បរទេស៖ តារាឆ្នើមរបស់ក្រុម Inter Milan កីឡាករ Lautaro Martinez បានសារភាពថា គាត់បានទៅពិគ្រោះយោបល់ជាមួយគ្រូពេទ្យចិត្តសាស្ត្រ ក្នុងគោលបំណងធ្វើឱ្យវិន័យរបស់ខ្លួនមានភាពប្រសើរឡើងជាងមុន។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
ជាការពិតណាស់ កាលពីរដូវក្តៅមុន គាត់ធ្លាប់បានមានទំនាក់ទំនងក្នុងការផ្ទេរចេញទៅកាន់ក្រុម Barcelona ប៉ុន្តែចុងក្រោយ គាត់ត្រូវស្នាក់នៅទឹកដី អ៊ីតាលី ដដែល, ម្យ៉ាងទៀតគាត់ក៏បានជួយឱ្យក្រុម Inter Milan ឈ្នះជើងឯក Serie A ផងដែរ។
ខ្សែប្រយុទ្ធវ័យ ២៣ ឆ្នាំ ហាក់មិនសូវពេញចិត្តនឹងទម្រង់លេងរបស់ខ្លួនឯងនោះឡើយ ហើយជាពិសេសគឺចំនួនកាតលឿងដែលលោកធ្លាប់ទទួលបាន។ គាត់បានសារភាពថា គាត់នឹងចាត់វិធានការដើម្បីកែលម្អលើរឿងនេះ។
ទាក់ទងនឹងរឿងខាងលើ ខ្សែប្រយុទ្ធសញ្ជាតិ អាហ្សង់ទីន បាននិយាយយ៉ាងដូច្នេះថា៖
ខ្ញុំពិតជាសប្បាយចិត្ត ហើយពេញចិត្តមែនទែនជាមួយអាជីពរបស់ខ្ញុំ, ខ្ញុំបានធ្វើគ្រប់យ៉ាងជាមួយក្រុម Inter និង ជម្រើសជាតិ។ ខ្ញុំកំពុងតែមានការវិវឌ្ឍន៍នៃផ្នែករាងកាយ, ខ្ញុំបានព្យាយាមហ្វឹកហាត់យ៉ាងយកចិត្តទុកដាក់ ដើម្បីឱ្យសមត្ថភាពរបស់ខ្ញុំឈានដល់កម្រិតកំពូលមួយ។ ប៉ុន្តែយ៉ាងណាវាបានធ្វើឱ្យខ្ញុំស្មុគស្មាញផងដែរ ជាមួយចិត្តគំនិតរបស់ខ្ញុំ។ ការក្លាយជាឪពុកម្នាក់ គឺវាបានជួយដោះស្រាយបញ្ហានៅលើទីលានឱ្យខ្ញុំបានច្រើនផងដែរ។ គ្រូពេទ្យចិត្តសាស្ត្រម្នាក់បានជួយសម្រួលផ្លូវចិត្តរបស់ខ្ញុំ ពីការទទួលបានកាតលឿងច្រើននៅលើទីលាន៕
ប្រភព៖ Goal
Bong I.T