អឺរ៉ុប៖ កីឡាករ Paul Pogba ត្រូវបានអ្នកគាំទ្ររបស់ក្រុម Paris Saint-Germain ផ្ញើសារថា គាត់នឹងមិនត្រូវបានស្វាគមន៍ក្នុងការមកចូលរួមជាមួយក្លិបយក្សរបស់បារាំងនៅរដូវក្តៅនេះទេ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
ជាការពិតណាស់ ក្លិប PSG មួយរយៈចុងក្រោយនេះកំពុងមានព័ត៌មានលេចឮថា ពួកគេចង់ចុះកុងត្រាយក Pogba នៅរដូវក្តៅនេះ, ខណៈក្លិបយក្សនៅ Ligue ១ ក៏កំពុងតែព្យាយាមបញ្ចុះបញ្ចូលឱ្យខ្សែប្រយុទ្ធ Kylian Mbappe ស្នាក់នៅបន្តផងដែរ។
ទោះបីជាយ៉ាងណាក៏ដោយ អ្នកគាំទ្រមួយចំនួនរបស់ PSG បានប្រកាសជំទាស់ដោយបើកចំហ ចំពោះគំនិតដែលក្លិបយក្សរបស់បារាំងមួយនេះចង់ចុះកុងត្រាយកខ្សែបម្រើរបស់ក្រុម Manchester United, ខណៈកាលពីថ្ងៃ សៅរិ៍ កន្លងទៅអ្នកគាំទ្រទាំងអស់នោះបានយកបដាមួយទៅចងនៅកីឡដ្ឋាន Parc des Princes។
សារដែលបានសរសេរនោះ មានន័យយ៉ាងដូច្នេះថា៖
Pogba សូមអ្នកស្តាប់តាមម្តាយរបស់អ្នកទៅ, នាងមិនចង់ឱ្យអ្នកមកទីនេះទេ, រួមទាំងពួកយើងក៏មិនស្វាគមន៍អ្នកមកទីនេះដែរ!។
មូលហេតុចម្បងដែលអ្នកគាំទ្ររបស់ PSG មិនពេញចិត្តក្នុងការចុះកុងត្រាយកខ្សែបម្រើវ័យ ២៨ ឆ្នាំរូបនេះ គឺដោយសារតែគាត់ធ្លាប់បានផ្តល់បទសម្ភាសន៍មួយកាលពីខែ ឧសភា ឆ្នាំ ២០១៨ ទៅកាន់គេហទំព័រ Canal+ ថា៖
ខ្ញុំប្រាកដណាស់ ខ្ញុំនឹងមិនមកលេងនៅទឹកដី Parc des Princes នោះទេ។ ខ្ញុំមិនចាប់អារម្មណ៍នឹងក្លិបមួយនេះទេ ព្រោះថាឪពុក និងម្តាយរបស់ខ្ញុំ ពួកគាត់គឺជាអ្នកគាំទ្ររបស់ក្រុម Marseille ដូច្នេះ Paris គឺមិនសមនឹងផែនការរបស់ខ្ញុំនោះទេ៕
ប្រភព៖ Marca
Bong I.T