អង់គ្លេស៖ ក្រុមកាំភ្លើងធំ Arsenal បានបន្ដកុងត្រារយៈពេល៥ឆ្នាំ ឲ្យកីឡាករវ័យ២០ឆ្នាំ Emile Smith Rowe និងបានផ្ដល់ជូនអាវលេខ១០ ដែលធ្លាប់កាន់កាប់ដោយអតីតកីឡាករ Mesut Ozil ផងដែរ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
Smith Rowe បានបង្ហាញទម្រង់លេងគួរឲ្យចាប់អារម្មណ៍ នៅពាក់កណ្ដាលរដូវកាល ២០២០/២០២១ ដោយរកគ្រាប់បាល់បាន ៤គ្រាប់ និងបញ្ជូនបាល់ឲ្យមិត្ដរួមក្រុមទាត់បញ្ចូលទីបាន ៧លើក ក្នុងការបង្ហាញខ្លួន ៣៣ប្រកួត ជួយឲ្យក្រុមលោក Mikel Arteta បញ្ចប់រដូវកាលត្រឹមចំណាត់ថ្នាក់ទី ៨ នៃក្របខណ្ឌ Premier League ។
លោកគ្រូបង្វឹក Arteta បាននិយាយថា៖
ដូចដែលអ្នកទាំងអស់គ្នាបានឃើញកាលពីរដូវកាលមុន Smith Rowe គឺជាកីឡាករឆ្លាត និងមានសមត្ថភាពខ្ពស់ម្នាក់។ គាត់ជាកីឡាករមុតស្រួច ហើយចក្ខុវិស័យមិនធម្មតារបស់គាត់ បានធ្វើឲ្យគាត់ក្លាយជាកីឡាករសំខាន់សម្រាប់យើង។ អាកប្បកិរិយា និងឆន្ទៈរបស់គាត់ក្នុងរៀនសូត្រពីបាល់ទាត់ ក៏គួរឲ្យចាប់អារម្មណ៍ផងដែរ។
លោកបានបន្ដថា៖
ខ្ញុំដឹងថាអ្នកគាំទ្រទាំងអស់នឹងរីករាយជាមួយយើង ដោយសារ Smith Rowe បានប្ដេជ្ញាចិត្ដចំពោះអនាគតរបស់គាត់ សម្រាប់ក្លិប។ ហើយពេលនេះយើងនឹងចាំជួយគាត់ឲ្យមានការអភិវឌ្ឍបន្ថែមទៀត ហើយបានឃើញគាត់ក្លាយជាកីឡាករឆ្នើម ក្នុងក្រុមយុវជនដែលយើងកំពុងអភិវឌ្ឍ។
គួរឲ្យដឹងថា ក្រុម Arsenal ក៏បានច្រានចោលសំណើពីក្រុម Aston Villa ដែលចង់បាន Smith Rowe នៅក្នុងរដូវក្ដៅនេះផងដែរ៕
ប្រភព៖ dailypost
Bong I.T