លេចឮថា លោក Ancelotti ស្នើ R.Madrid ឲ្យចុះកុងត្រាយកកំផែងការពារអ៊ីតាលីរូបនេះ

អឺរ៉ុប៖ យោងតាមការចេញផ្សាយរបស់សារព័ត៌មាន RAI Sport បានឲ្យដឹងថា កីឡាករ Giorgio Chiellini ស្ថិតក្នុងបញ្ជីកីឡាករ ដែលក្រុម Real Madrid ចង់នាំចូលដើម្បីពង្រឹងតំបន់ការពារ បន្ទាប់ពីការចង់ចេញរបស់ Sergio Ramos ហើយ Raphael Varane អាចនឹងផ្លាស់ទៅ Manchester United ។

RAI Sport បានឲ្យដឹងដែរថា លោក Carlo Ancelotti ដែលជាគ្រូបង្វឹកថ្មីក្រុម Real Madrid មានបំណងនាំយកខ្សែការពារចាស់វស្សា វ័យ៣៦ឆ្នាំខាងលើ មករួមក្រុមនារដូវកាលថ្មី។ ខណៈដែលកុងត្រារបស់គាត់នៅឯក្រុម Juventus បានផុតកំណត់តាំងពីថ្ងៃទី៣០ ខែមិថុនា ឆ្នាំ២០២០មកម្ល៉េះ ហើយពុំមានកិច្ចព្រមព្រៀងថ្មីទេ ដូច្នេះពេលនេះគាត់ជាកីឡាករគ្មានតម្លៃខ្លួន និងមិនទាន់មានក្លិបសម្រាប់លេងនៅឡើយ។

គួរឲ្យដឹងថា Chiellini បានលេងឲ្យក្រុម Juventus ចំនួន ១៦រដូវកាលជាប់ៗគ្នា ក្រោយពីផ្លាស់មកពីក្លិប Fiorentina ក្នុងឆ្នាំ ២០០៥ ។ ហើយកាលពីរដូវកាលមុន ខ្សែការពារវ័យ ៣៦ឆ្នាំរូបនេះ លេងឲ្យក្រុមសេះបង្កង់បានរយៈពេល ១,៧៨៦នាទី ឆ្លងកាត់ការប្រកួតសរុបចំនួន ២៥ប្រកួត។

ថ្មីៗនេះដែរ គាត់បានដើរតួយ៉ាងសំខាន់ក្នុងតំបន់ការពារក្រុមជម្រើសជាតិអ៊ីតាលី ដោយលេងបាន ៥ប្រកួត ក្នុងចំណោមការប្រកួតទាំង ៧ រហូតជួយក្រុមឈ្នះជើង EURO 2020 ។

ប្រភព៖ besoccer