បរទេស៖ ក្រុមជម្រើសជាតិអេស្ប៉ាញ ជាក្រុមបាល់ទាត់ដែលមានតម្លៃខ្លួនកីឡាករបូកបញ្ជូលគ្នា ថ្លៃជាងក្រុមនានាដែលមកចូលរួមព្រឹត្ដិការណ៍កីឡាអូឡាំពិកនៅក្នុងប្រទេសជប៉ុន ដែលជាព្រឹត្ដិការណ៍កីឡារធំមួយ ត្រូវបានគេរៀបចំឡើងរៀងរាល់៤ឆ្នាំម្ដង។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សយោងតាមគេហទំព័រ Transfermarkt បានឲ្យដឹងថាតម្លៃខ្លួនសរុបរបស់ក្រុមកីឡាករអេស្ប៉ាញ មានរហូតដល់ទៅ ៤៨៧លានផោនឯណោះ (ឬប្រមាណ ៦៦៣លានដុល្លារអាមេរិក)។ ប៉ុន្ដែតាមពិតទៅ វាមិនមែនជារឿងភ្ញាក់ផ្អើលនោះទេ បើពិចារណាលើកីឡាករចំនួន ៩រូបដែលមានតម្លៃខ្លួនខ្ពស់ ក្នុងចំណោមកីឡាករនៃក្រុមគោជល់អេស្ប៉ាញចំនួន ១៥រូប។
ក្នុងនោះរាប់បញ្ជូលទាំងកីឡាករឆ្នើម២រូប គឺខ្សែបម្រើ Pedri មកពីក្រុម Barca ដែលមានតម្លៃខ្លួន ៧២លានផោន និងខ្សែប្រយុទ្ធស្លាប Mikel Oyarzabal មកពីក្រុម Real Sociedad ដែលមានតម្លៃខ្លួន ៦៣លានផោន។ នៅមានកីឡាករសំខាន់ៗមួយចំនួនទៀតដូចជា Dani Olmo និង Pau Torres មានតម្លៃប្រមាណ ៤៥លានផោនដូចគ្នា ខណៈ Carlos Soler និង Mikel Merino មានតម្លៃខ្លួនប្រមាណ ៣៦លានផោនដូចគ្នា។
ដោយឡែក ជម្រើសជាតិប្រេស៊ីលឈរនៅលំដាប់ទី២ ដោយក្រុមកីឡាករមានតម្លៃខ្លួនសរុប ៣១៥លានផោន (ឬប្រមាណ ៤២៩ដុល្លារអាមេរិក) និងមានកីឡាករ Richarlison ជាកីឡាករមួយរូបមានតម្លៃខ្លួនខ្ពស់ជាងគេក្នុងក្រុម គឺប្រមាណ ៤៩.៥លានផោន។ ស្របពេលក្រុមជម្រើសជាតិអាល្លឺម៉ង់វិញ ឈរនៅលំដាប់ទី៣ ដោយក្រុមកីឡាករមានតម្លៃខ្លួនសរុប ១១១លានផោនប៉ុណ្ណោះ អាចនិយាយបានថា ទាបជាងក្រុមអេស្ប៉ាញដល់ទៅ ៤ដង៕
ប្រភព៖ thesun