តិចច្រឡំព្យុះ តាមពិតហ្វូងមូសហោះផ្ដុំគ្នាទេ ដែលធ្វើឲ្យអ្នកដំណើរផ្អើលលាន់ (មានវីដេអូ)

រុស្ស៊ី៖ មហាជនអ្នកប្រើប្រាស់បណ្ដាញសង្គម បានសម្ដែងការភ្ញាក់ផ្អើល ជុំវិញវីដេអូឃ្លីបខ្លីមួយ ដែលថតបង្ហោះនូវសកម្មភាព ហ្វូងមូសដែលមានគ្នារាប់លានក្បាល ហោះផ្ដុំគ្នាពេញលើអាកាស។

វីដេអូឃ្លីបខ្លីនេះ ត្រូវបានថតឡើងនៅតាមដងផ្លូវនៃភូមិមួយ ក្នុងតំបន់ Ust-Kamchatsk ហើយយកទៅបង្ហោះចែកចាយដោយទទួលបានការចាប់អារម្មណ៍យ៉ាងខ្លាំង។

យោងតាមសម្ដីរបស់ម្ចាស់វីដេអូឃ្លីប ឈ្មោះថា Alexei បាននិយាយរៀបរាប់ថា រូបគាត់ផ្ទាល់បានបើកឡានឆ្លងកាត់ផ្លូវដែលមានហ្វូងមូសហោះផ្ដុំគ្នា ដែលធ្វើឲ្យគាត់ពិបាកក្នុងការមើលផ្លូវណាស់ និងមិនហ៊ានបើកបង្អួចឡានឡើយ។ ហើយហ្វូងមូសមានសឹងគ្រប់ទីកន្លែង និងមិនអាចរកឃើញបានទេថា វាហោះផ្ដាច់ចេញពីគ្នានៅកន្លែងទេ។

ទន្ទឹមនឹងនេះដែរ អ្នកជំនាញបានប្រាប់ប្រព័ន្ធផ្សព្វផ្សាយក្នុងស្រុកថា មិនគួរព្រួយបារម្ភទេ ចំពោះហេតុការណ៍នេះ ដែលមូសឈ្មោលហោះហើរចោមរោមមូលញីប៉ុណ្ណោះ ដើម្បីបង្កាត់ពូជ ហើយមូសទាំងនោះក៏មិនវាយប្រហារទៅលើមនុស្សដែរ។ ចំពោះការប្រើថ្នាំបាញ់សម្លាប់វិញ ក៏មិនមានប្រសិទ្ធភាពធ្វើឲ្យវាបាត់អស់ទាំងស្រុងដែរ។

យ៉ាងណាមិញ ជុំវិញហេតុការណ៍ខាងលើនេះ មានភាពស្រដៀងគ្នា ទៅនឹងហេតុការណ៍ដែលបានកើតឡើងកាលពីឆ្នាំមុនក្នុងសហរដ្ឋអាមេរិក ដែលពេលនោះ កសិករបានរាយការណ៍ថាសត្វក្នុងកសិដ្ឋានពី៣០០ ទៅ៤០០ក្បាលបានបាត់បង់ជីវិត ដោយសារមូសបឺតជញ្ចក់ឈាម៕

សូមទស្សនារូបភាពខាងក្រោម៖

ប្រភព: Daily Mail