ហ្វីលីពីន៖ អ្នកជំនាញខាងពស់ម្នាក់ មកពីប្រទេសហ្វីលីពីន ធ្លាប់បានអះអាងថា រូបគាត់ផ្ទាល់មានភាពស៊ាំនឹងពិស តែបែរជាស្លាប់ដោយសារពស់វែកខាំទៅវិញ។ នេះបើយោងតាមប្រភពសារព័ត៌មាន Daily Mail ចុះផ្សាយកាលពីម្សិលមិញ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សលោក Bernardo Alvarez អាយុ៦២ឆ្នាំ រស់នៅក្នុងខេត្ត Pangasinan ហើយកាលពីថ្ងៃទី០៩ ខែកក្កដាកន្លងទៅថ្មីៗនេះ គាត់បានចាប់ពស់វែកមួយក្បាលជាពស់វែកប្រភទពូជហ្វីលីពីនខាងជើង ដើម្បីថើបវា ទុកជាបង្ហាញឲ្យអ្នកភូមិបានឃើញ។ តែផ្ទុយទៅវិញ នៅពេលគាត់ថើបវា ក៏ស្រាប់តែវារំកិលស្ទុះទៅមុខ និងខាំអណ្ដាតគាត់ ដែលបណ្ដាលឲ្យគាត់ដួល ហើយស្រែកដោយមានការឈឺចាប់ភ្លាមៗ។
ក្រោយមក ប៉ូលិស និងក្រុមគ្រូពេទ្យ បានប្រញាប់ប្រញាល់ចុះទៅដល់ទីតាំងកើតហេតុផ្ទាល់ តែជាអកុសលបុរសខាងលើ បានស្លាប់បាត់បង់ជីវិតទៅហើយ ដោយសារតែពិសពស់វែកខ្លាំង ដែលធ្វើឲ្យរាងកាយមានសភាពយ៉ាងរឹង។
យ៉ាងណាមិញ សាកសពរបស់គាត់នឹងត្រូវបានក្រុមគ្រួសារបញ្ចុះនៅក្នុងសប្ដាហ៍នេះ ហើយចំណែកពស់វែកនោះវិញ ក៏ត្រូវបានអ្នកភូមិខឹង និងសម្លាប់ចោលផងដែរ។ ទន្ទឺមនឹងនេះ លោកវេជ្ជបណ្ឌិត Anna de Guzman មន្រ្តីសុខាភិបាលខេត្តបានមានប្រសាសន៍ថា៖
ពិសរបស់ពស់វែក អាចបណ្ដាលឲ្យជនរងគ្រោះខ្វិន ដែលភាពខ្វិននេះអាចបញ្ឈប់ការដកដង្ហើម និងធ្វើឲ្យប៉ះពាល់ដល់ចរន្តអុកស៊ីសែននៅក្នុងខ្លួន ហើយទីបំផុតបញ្ឈប់ការដើរនៃចង្វាក់បេះដូង។ ពស់វែកហ្វីលីពីនខាងជើង ត្រូវបានគេទទួលស្គាល់ថា ជាពស់មួយក្នុងចំណោមពស់ដទៃទៀត ដែលគ្រោះថ្នាក់បំផុតលើពិភពលោក ហើយពិសរបស់វានៃការខាំម្ដង អាចវាយប្រហារប្រព័ន្ធដង្ហើមរបស់ជនរងគ្រោះឲ្យស្លាប់បាន៕
ប្រភព: Daily Mail
Bong I.T