ប្រសើរណាស់! កម្មវិធី Google Photos នឹងមានមុខងារ អាចស្នើសុំរូបថតពីមិត្តភក្ដិបងប្អូន

បរទេស៖ បច្ចុប្បន្ន ក្រុមហ៊ុន Google កំពុងធ្វើការលើមុខងារថ្មី សម្រាប់កម្មវិធី Google Photos ដែលនឹងអនុញ្ញាតឲ្យអ្នក ចែករំលែកលីងជាមួយមិត្តភក្ដិរបស់អ្នក ដើម្បីស្នើសុំរូបថត។ វាអាចជាវិធីនៃការប្រមូលទុកនៃរូបថតអនុស្សាវរីយ៍ទាំងអស់រួមគ្នា ពីព្រឹត្តិការណ៍ពិសេសឬឱកាសជួបជុំគ្រួសារ ឬក៏ដើម្បីសុំមើលទិដ្ឋភាពដែលយើងមិនបានចូលរួមដោយផ្ទាល់ផងដែរ។

មុខងារពិសេសចុងក្រោយនេះ ត្រូវ​បានបង្ហាញដោយអ្នកជំនាញស៊ើបអង្កេតកម្មវិធី នាង Jane Manchun Wong។ រូប screenshots របស់នាងបានបង្ហាញផ្ទៃថ្មីមួយ នៅផ្នែក Sharing tab ក្នុងកម្មវិធី Google Photos ដែលដាក់ថា Ask friends for photos ដែលនឹងនាំយើងទៅកាន់អេក្រង់ ដែលអាចបង្កើតលីងផ្ទាល់ខ្លួន ហើយផ្ញើទៅកាន់មិត្តភក្តិនិងគ្រួសាររបស់យើង។

នៅពេលយើងបានទទួលមុខងារនេះ នៅក្នុងកម្មវិធី Google Photos (នៅលើប្រព័ន្ធប្រតិបត្តិការ iOS ឬ Android) ពួកយើងអាចចែករំលែករូបភាពជាក្រុមជាមួយអ្នកផ្ញើ។ វាអាចជាវិធីសាស្ត្រដ៏ល្អមួយ សម្រាប់ប្រមូលផ្ដុំរូបថតនៃកម្មវិធីខួបកំណើតឬពិធីមង្គលការពីភ្ញៀវនានា ដូចនេះយើងអាចបង្កើតជាអាល់ប៊ុមមួយ ដើម្បីឲ្យអ្នកទាំងអស់គ្នាបានឃើញ។ គេមិនទាន់ដឹងច្បាស់ថា ពេលណាទើបមុខងារពិសេសនេះត្រូវបានដាក់ឲ្យប្រើជាសាធារណៈនោះទេ៕

ប្រភព: Android Police