ទឹកចិត្តម្ដាយ! មេសុនខមួយក្បាលនេះ ថ្ងូរដាក់មនុស្ស និងនាំផ្លូវឲ្យទៅជួយកូនរបស់វា ដែលស្អិតជាប់សុទ្ធតែដីភក់ (មានវីដេអូ)

រុស្ស៊ី៖ មហាជនអ្នកប្រើប្រាស់បណ្ដាញសង្គម បានសម្ដែងអារម្មណ៍ក្ដុកក្ដួល ជុំវិញវីដេអូឃ្លីបខ្លីមួយ ដែលថតបង្ហោះចែកចាយនូវសកម្មភាព មេសុនខមួយក្បាល បានថ្ងូរសុំជំនួយពីមនុស្ស ឲ្យទៅជួយកូនរបស់វា។

តាមប្រភពព័ត៌មានបានឲ្យដឹងថា វីដេអូឃ្លីបខ្លីនេះ ត្រូវបានថតឡើងនៅតំបន់មួយ ក្នុងទីក្រុង Yakutsk នៃប្រទេសរុស្ស៊ី ហើយយកទៅបង្ហោះចែកចាយដោយទទួលបានការចាប់អារម្មណ៍យ៉ាងខ្លាំង។

ជាក់ស្ដែងតាមរយៈវីដេអូបង្ហាញឲ្យឃើញថា មេសុនខបានថ្ងូរសុំជំនួយទៅកាន់ជាងធ្វើផ្លូវ ដែលមានគ្នាចំនួនពីរនាក់ ហើយវាបានថ្ងូរបណ្ដើរ និងដើរនាំផ្លូវបណ្ដើរ ដើម្បីឲ្យទៅជួយកូនរបស់វា ដែលកំពុងស្ថិតក្នុងស្ថានភាពពិបាក ដោយមានដីភក់ខ្មៅល្អិតជាប់ពេញខ្លួន និងរើខ្លួនមិនរួច។ ឃើញដូច្នេះ ជាងធ្វើផ្លូវទាំងពីរ បាននាំគ្នាយកកូនសុនខទៅលាងទឹកជម្រះចេញយ៉ាងស្អាត នៅទន្លេក្បែរៗនោះ។

យ៉ាងណាមិញ បន្ថែមពីនេះទៀត ជាងធ្វើផ្លូវទាំងពីរ បានដាក់ទឹកដោះគោឲ្យកូនសុនខផឹក និងនាំទៅពេទ្យសត្វ ដើម្បីទទួលវីតាមីន ហើយឥឡូវ វាកំពុងស្ថិតនៅក្រោមការមើលថែរបស់ខាងសប្បុរធម៌។ ចំណែកមេសុនខវិញ ក៏មានសកម្មភាពហាក់សប្បាយចិត្តឡើងវិញផងដែរ៕

សូមទស្សនារូបភាពនិងវីដេអូខាងក្រោម៖

ប្រភព: Daily Mail