បានពានជូនជាតិហើយ! រូបភាពប៉ុន្មានសន្លឹករបស់ Messi ឱបភរិយានៅព្រលានយន្តហោះធ្វើឲ្យអ្នកគាំទ្ររំភើបតាម(មានវីដេអូ)

អាហ្សង់ទីន៖ វាជារឿងគួរឲ្យរំភើបមួយដែលកំពូលខ្សែប្រយុទ្ធ Lionel Messi អាចលើកពាន Copa America ជាមួយក្រុមជម្រើសជាតិអាហ្សង់ទីនទាំងអស់កាលពីថ្ងៃអាទិត្យទី១១ម្សិលមិញ ក្រោយយកឈ្នះ ប្រេស៊ីល ១ ទល់នឹង ០ ។

ជ័យជម្នះដ៏គគ្រឹកគគ្រេងនេះបានធ្វើឲ្យអ្នកគាំទ្រមានការសាទរខ្សែប្រយុទ្ធរូបនេះខណៈដែល អាហ្សង់ទីនខកខានឱកាសលើកពានតាំងពីឆ្នាំ១៩៩៣ មកម៉្លេះ។

បន្ទាប់ពីលើកពាន Copa America នៅប្រទេសប្រេស៊ីលដែលទទួលធ្វើជាម្ចាស់ផ្ទះរួចមក ក្រុមកីឡាកររបស់អាហ្សង់ទីនទាំងអស់បាននាំគ្នាធ្វើដំណើរត្រឡប់មកប្រទេសកំណើតនិងស្នាក់នៅក្រុង Buenos Aires  ដោយ Messi បានចំណាយពេលធ្វើដំណើរមកក្រុង Rosario មួយតង់ទៀតដើម្បីជួបគ្រួសារ។

គ្រាន់តែ Messi ចុះពីលើយន្តហោះភ្លាម អ្នកស្រី Antonela Roccuzzo ដែលជាភរិយារបស់គេបានរត់មកឱបស្វាមីយ៉ាងសប្បាយរីករាយហើយអ្នកទាំងពីរបានឱបរឹតគ្នាយ៉ាងយូរស្ដែងឲ្យឃើញពីការនឹករលឹកដែលរូបភាពនោះត្រូវបានចែកចាយពេញបណ្ដាញអ៊ីនធើណេត។

អ្នកស្រី Antonela ដែលមានកូនប្រុសបីនាក់ជាមួយ Messi ក៏បានបង្ហោះសាអបអរស្វាមីភ្លាមៗក្រោយការប្រកួតចប់ផងដែរ។
បន្ទាប់ពីជួបជុំគ្នាជាមួយភរិយានិងកូនប្រុសវិញ Lionel Messi ក៏បានចុះហត្ថលេខាដល់អ្នកគាំទ្រដែលមករង់ចាំទទួលនៅព្រលានយន្តហោះផងដែរ៕

ទស្សនាវីដេអូខាងក្រោម៖

ប្រភព៖ marca