ព័រទុយកាល់មិនបានឡើងដល់វគ្គផ្ដាច់ព្រ័ត្រមែនតែ Ronaldo ឈ្នះពានដ៏ពិសេសមួយនេះ

អង់គ្លេស៖ ក្រោយក្រុមជម្រើសជាតិអ៊ីតាលី លើកពាន Euro រួចមក សហព័ន្ធកីឡាបាល់ទាត់ទ្វីបអឺរ៉ុបហៅកាត់ថា UEFA បានប្រកាសថា ខ្សែប្រយុទ្ធ Cristiano Ronaldo ជាម្ចាស់ពានស្បែកជើងមាសសម្រាប់ព្រឹត្តិការណ៍ Euro 2020 បន្ទាប់ពីរកបាន៥គ្រាប់ក្នុងការប្រកួតនេះ។

Ronaldo បានដឹកនាំក្រុមជម្រើសជាតិព័រទុយកាល់ឡើងផុតពីវគ្គចែកពូល F ប៉ុន្តែគួរឲ្យសោកស្តាយដែលក្រុមមួយនេះធ្លាក់ត្រឹមវគ្គ១៦ក្រុមដោយលេងបានត្រឹម៤ប្រកួតគត់។

ប៉ុន្តែយ៉ាងណាមិញ កីឡាករវ័យ៣៦ឆ្នាំរូបនេះ នៅតែរក្សាកំណត់ត្រាជាកីឡាករស៊ុតបញ្ចូលទីបានច្រើនជាងគេនៅព្រឹត្តិការណ៍ Euro នេះដោយយកឈ្នះខ្សែប្រយុទ្ធ Harry Kane និង Raheem Sterling នៃក្រុមជម្រើសជាតិអង់គ្លេស។

Patrik Schick ដែលជាកីឡាកររបស់សាធារណរដ្ឋឆេក រកបាន៥គ្រាប់ដែរក្នុងការប្រកួតនេះប៉ុន្តែគេវ៉ាដាច់ Ronaldo មិនបានដោយសារ ប្រធានក្រុមព័រទុយកាល់រូបនេះបានបញ្ជូនបាល់ថែម១គ្រាប់ទៀត។

គួរបញ្ជាក់ផងដែរថា ៣គ្រាប់ ក្នុងចំណោមគ្រាប់ទាំង៥ ដែល Ronaldo រកបាននៅព្រឹត្តិការណ៍នេះ សុទ្ធសឹងតែចេញពីបាល់ប៉េណាល់ទីទាំងអស់។

ស្របគ្នានោះដែរ អ្នកចាំទី Gianluigi Donnarumma បានឈ្នះពានកីឡាករឆ្នើមបំផុតប្រចាំការប្រកួតនៅ Euro 2020 នេះដោយរក្សាសំណាញ់ទីមិនឲ្យគូប្រកួតស៊ុតចូលបានដល់ទៅ៣ប្រកួតទៀតផង៕

ប្រភព៖ thesun