ពង្រឹងប្រព័ន្ធភាពស៊ាំនៅរដូវភ្លៀង ជាមួយអាហារទាំង៦ប្រភេទ!

//s9.kh1.co/c9/c99d605905a181e0327e0b76f51273135e236fd4.jpg

យល់ដឹង

១០-កក្កដា-២០២១ ៣ល្ងាច · ៣ ឆ្នាំមុន

គ្នាយើងភាគច្រើនតែងប្រឈមនឹងជំងឺផ្ដាសាយ ក្អក គ្រុនក្ដៅ ឬការឆ្លងមេរោគនៅអំឡុងរដូវភ្លៀង។

គ្នាយើងភាគច្រើនតែងប្រឈមនឹងជំងឺផ្ដាសាយ ក្អក គ្រុនក្ដៅ ឬការឆ្លងមេរោគនៅអំឡុងរដូវភ្លៀង។ ដូច្នេះហើយ យើងចាំបាច់ការពារខ្លួនប្រឆាំងនឹងជំងឺផ្សេងៗ ដោយការពង្រឹងប្រព័ន្ធភាពស៊ាំ។ ពិតណាស់ មានវិធីសាស្ត្រជាច្រើនដែលអាចជួយឲ្យប្រព័ន្ធភាពស៊ាំរឹងមាំ ដូចជាការហាត់ប្រាណជាប្រចាំ និងការញ៉ាំភេសជ្ជៈសុខភាព។ បន្ថែមពីនេះ ការជ្រើសរើសអាហារត្រឹមត្រូវក៏ជះឥទ្ធិពលយ៉ាងខ្លាំងចំពោះប្រព័ន្ធភាពស៊ាំដូចគ្នា។ អាហារខាងក្រោមនេះ អាចជួយពង្រឹងប្រព័ន្ធភាពស៊ាំយ៉ាងមានប្រសិទ្ធភាព។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

១. ផ្លែទទឹម

ផ្លែទទឹមសម្បូរទៅដោយសារធាតុចិញ្ចឹមខ្ពស់ដូចជាវីតាមីនC និងជាតិសរសៃដើម្បីជួយបង្កើនថាមពល និងបង្កើតប្រព័ន្ធភាពស៊ាំ។ លើសពីនេះ ផ្លែទទឹមក៏អាចជួយពង្រឹងប្រព័ន្ធរំលាយអាហារ ប្រឆាំងនឹងជំងឺទឹកនោមផ្អែមប្រភេទ២ និងគ្រប់គ្រងសម្ពាធឈាមបានយ៉ាងល្អ។

២. ទឹកដោះគោជូរមានជាតិខ្លាញ់ទាប

ពពួកបាក់តេរីល្អដែលមាននៅក្នុងទឹកដោះគោជូរអាចជួយពង្រឹងប្រព័ន្ធភាពស៊ាំ។ បន្ថែមពីនេះ វាក៏ជាប្រភពវីតាមីន និងសារធាតុរ៉ែ ដែលមានគុណប្រយោជន៍អាចជួយឲ្យសុខភាពទាំងមូលប្រសើរឡើង។

៣. ឪឡឹក

ជាក់ស្ដែង ផ្លែឪឡឹកមានរសជាតិឆ្ងាញ់ និងពោរពេញទៅដោយសារធាតុប្រឆាំងនឹងអុកស៊ីតកម្ម ដែលអាចជួយការពារកោសិការបស់យើង។ វាថែមទាំងមានផ្ទុកវីតាមីនA, B និងC ព្រមទាំងសារធាតុlycopene ដែលអាចជួយការពារយើងពីកាំរស្មីយូវី ហើយសារធាតុចិញ្ចឹមទាំងនេះអាចកាត់បន្ថយការឆ្លងមេរោគនៅរដូវភ្លៀងនេះ។

៤. ខាត់ណាខៀវ

ជាមួយគ្នានេះដែរ ខាត់ណាខៀវ ផ្ទុកជាតិដែក ប៉ូតាស្យូម កាល់ស្យូម និងម៉ាញ៉េស្យូម។ បន្លែមួយប្រភេទនេះក៏សម្ពូរទៅដោយជាតិសរសៃ និងវីតាមីនA, C, E, K។ បន្ថែមពីនេះ វាមានផ្ទុកវីតាមីនB រួមទាំងអាស៊ីដហ្វូឡេត ដែលល្អបំផុតសម្រាប់ប្រព័ន្ធភាពស៊ាំ។

៥. ក្រូច

ក្រូចត្រូវបានស្គាល់ថាជាប្រភពនៃវីតាមីនC ដែលអាចជួយជំរុញប្រព័ន្ធភាពស៊ាំបានយ៉ាងអស្ចារ្យ។ វាក៏ជួយបង្កើនការស្រូបយកជាតិដែកទៅក្នុងរាងកាយ និងជួយបង្កើតការផលិតខូឡាជែន ព្រមទាំងការពារកោសិកាពីការបំផ្លាញ។

៦. ស្ពៃពួយឡេង

ចំណែកឯស្ពៃមួយប្រភេទនេះ ក៏ជាបន្លែដែលមានគុណប្រយោជន៍សម្បូរបែប។ វាផ្ទុកទៅដោយសារធាតុប្រឆាំងនឹងអុកស៊ីតកម្ម និងសារធាតុBeta Carotene ដែលជួយបន្ថែមសមត្ថភាពរបស់ប្រព័ន្ធភាពស៊ាំក្នុងការប្រឆាំងនឹងការឆ្លងមេរោគផ្សេងៗ។

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕

អត្ថបទផ្ដល់សិទ្ធិដោយ Hello Krupet