អង់គ្លេស៖ ខ្សែការពារ Giorgio Chiellini បានបង្ហើបឲ្យដឹងថាកីឡាករដែលអង្គុយកៅអីបម្រុងរបស់ក្រុមជម្រើសជាតិអង់គ្លេសអាចលេងដើម្បីលើកពាន Euro បានប៉ុន្តែគេថា អ៊ីតាលី នឹងមិនខ្លាច អង់គ្លេស ឡើយ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
ក្រុមទាំងពីរនឹងត្រូវជួបតទល់គ្នាក្នុងវគ្គផ្ដាច់ព្រ័ត្រ Euro ថ្ងៃទី១២ខែកក្កដា វេលាម៉ោង២ទាបភ្លឺ នេះហើយ បន្ទាប់ពី អ៊ីតាលី បំបាក់ក្រុមគោជល់អេស្ប៉ាញ ហើយអង់គ្លេស បានយកឈ្នះ ដាណឺម៉ាក ។
Chiellini បាននិយាយថាតាំងពីដំបូងគឺគេគិតថា អង់គ្លេស មានអាទិភាពក្នុងការឈ្នះពាន Euro នេះ ដោយសារក្រុមរបស់លោកគ្រូបង្វឹក Gareth Southgate មានកីឡាករពោរពេញ ដោយគុណភាពនិងកាយសម្បទា ប៉ុន្តែក៏មិនបានមានន័យថា អ៊ីតាលី ត្រូវខ្លាច អង់គ្លេសនោះដែរ។
ថ្លែងក្នុងសន្និសីទមុនបើកការប្រកួត កីឡាករវ័យ៣៦ឆ្នាំរូបនេះថា៖
ពួកយើងគិតថានឹងបានជួបបារាំងនៅវគ្គពាក់កណ្ដាលផ្ដាច់ព្រ័ត្រ មិនមែនអេស្ប៉ាញទេ ដោយសារតែពួកគេជាក្រុមខ្លាំងមួយ។ ខ្ញុំគិតថាបារាំងគេខ្លាំងណាស់ អ៊ីចឹងហើយទើបគិតថាមុនឡើងមកដល់វគ្គនេះប្រហែលបានជួប បែលស៊ិក បារាំង និងអង់គ្លេស។ ភ្លាមនោះខ្ញុំក៏គិតថាអង់គ្លេសជាគូប្រជែងមួយដ៏ស្វិតស្វាញក្នុងការដណ្ដើមពាន Euro នេះ។ ពួកគេមានទាំងគុណភាពនិងកាយសម្បទាល្អ និងមានការរៀបចំក្រុមបានល្អណាស់។ ប្រាកដណាស់ថាការយកឈ្នះពួកគេជារឿងពិបាក។ ពួកគេបានឡើងមកដល់វគ្គពាក់កណ្ដាលផ្ដាច់ព្រ័ត្រនៅបាល់ទាត់ពិភពលោក ខ្ញុំអាចទាយទុកមុនបានថាអង់គ្លេសនឹងឡើងមកដល់វគ្គផ្ដាច់ព្រ័ត្រ Euro ដោយសារពួកគេលេង៦ក្នុងចំណោម៧ប្រកួតនៅទឹកដីខ្លួនឯង។ តែមិនមែនត្រឹម Kane ទេ ខ្ញុំមើលឃើញថាកីឡាករអង្គុយកៅអីបម្រុងដូចជា Jack Grealish, Jadon Sancho, Marcus Rashford, Dominic Calvert-Lewin និង Phil Foden អាចលេងដើម្បីលើកពាន Euro បាន។ វានឹងក្លាយជាការប្រកួតមួយដ៏អស្ចារ្យ ប៉ុន្តែពួកយើងមិនខ្លាចគ្នាទេ តែពួកយើងគោរពគ្នា៕
គួរបញ្ជាក់ផងដែរថា ក្រុមជម្រើសជាតិ អ៊ីតាលី លេងមិនដែលចាញ់បាន៣២ប្រកួតហើយប៉ុន្តែ Giorgio Chiellini នៅនិយាយថាពួកគេមិនគួរសរុបថាខ្លួនឯងនឹងឈ្នះពាននេះទេ៕
ប្រភព៖ dailymail
Bong I.T