បាងកក៖ ប្រទេសថៃគ្រោងនឹងកែប្រែស្ថានីយមួយនៅអាកាសយានដ្ឋានអន្តរជាតិដ៏សំខាន់មួយទៅជាមន្ទីរពេទ្យ ដោយសារការកើនឡើងករណីឆ្លងជំងឺកូវីដ១៩ ខណៈប្រព័ន្ធសុខភាពសាធារណៈបង្ហាញសញ្ញាធូរស្បើយតិចតួចបំផុត។ នេះបើយោងតាមប្រភពព័ត៌មាន Bloomberg ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សសេចក្តីថ្លែងការណ៍របស់រដ្ឋាភិបាលប្រទេសនេះ កាលពីល្ងាចថ្ងៃអង្គារបានឱ្យដឹងថា ក្រុមហ៊ុន Airports of Thailand Pcl ដែលជាប្រតិបត្តិករអាកាសយានដ្ឋានអន្តរជាតិសុវណ្ណភូមិ ត្រូវបានគេស្នើសុំឲ្យផ្លាស់ប្តូរស្ថានីយដែលទើបសាងសង់ថ្មី ទៅជាបន្ទប់សង្គ្រោះបន្ទាន់ (ICU) បន្ទប់ព្យាបាល និងជាទីកន្លែងសម្រាប់អ្នកជំងឺដែលមានរោគសញ្ញាស្រាល ទៅមធ្យម ហើយទីតាំងនេះទៀតសោធ នឹងអាចដាក់គ្រែអ្នកជំងឺយ៉ាងតិច ៥,០០០ គ្រែ។
យ៉ាងណាមិញ បើយោងតាមលោក Kumnuan Ungchusak អ្នកជំនាញផ្នែករោគរាតត្បាត និងជាទីប្រឹក្សាក្រសួងសុខាភិបាល បានលើកឡើងកាលពីសប្តាហ៍មុនថា អគារសុខាភិបាលគឺពេញអស់ហើយ ហើយអត្រាអ្នកស្លាប់អាចកើនឡើងទ្វេដងនៅខែសីហា ប្រសិនបើករណីឆ្លងនេះនៅតែបន្តកើនឡើង។
គួរជម្រាបថា ករណីឆ្លងនិងស្លាប់ដោយសារកូវីដ១៩នៅប្រទេសថៃ បានកើនឡើងដល់កំណត់ត្រាថ្មីក្នុងខែនេះ ហើយភាគច្រើនស្ថិតនៅក្នុងទីក្រុងបាងកក ខណៈដែលក្រុមការងារកូវីដ១៩ ក៏ត្រៀមនឹងពិចារណាលើសំណើសម្រាប់ការបិទខ្ទប់នៅចំណុចសំខាន់ៗនៃទីក្រុងបាងកក និងតំបន់ជុំវិញផងដែរ។