ចិនចេញវិធានការ ស្កេនស្វែងរកក្មេងលេងហ្គេមដាច់យប់ ដោយប្រើវិធីសាស្ត្រនេះ

ចិន៖ ក្រុមហ៊ុនយក្សហ្គេមចិន Tencent បានកំពុងបញ្ចេញបច្ចេកវិទ្យាសម្គាល់មុខ ដើម្បីបញ្ឈប់ក្មេងៗលេងហ្គេម នៅចន្លោះម៉ោង២២:០០ ដល់ម៉ោង៨:០០។ បច្ចេកវិទ្យាល្បាតពេលយប់នេះនឹងបញ្ឈប់ការលួចលេងរបស់ក្មេងៗ ដែលរដ្ឋាភិបាលចេញវិធានការតាំងពីឆ្នាំ២០១៩។

ការហាមឃាតតម្រូវឲ្យអ្នកលេងហ្គេម ចុះឈ្មោះដោយប្រើអត្តសញ្ញាណប័ណ្ណផ្លូវការរបស់ពួកគេ ភ្ជាប់ទៅមូលដ្ឋានទិន្នន័យជាតិ។ ប៉ុន្តែចំពោះកុមារត្រូវបានគេរាយការណ៍មកថា តម្រូវឲ្យប្រើអត្តសញ្ញាណប័ណ្ណរបស់មនុស្សពេញវ័យ ជំនួសឲ្យរបស់ពួកគេ។ ហើយឥឡូវនេះ អ្នកដែលលេងហ្គេមនៅក្នុងពេលវេលាដែលបានកំណត់ នឹងតម្រូវឲ្យមានការស្កេនមុខ ដើម្បីបញ្ជាក់ថា ពួកគេជាមនុស្សពេញវ័យ។

ការស្កេនសម្គាល់មុខគឺមានភាពងាយស្រួលអនុវត្តដោយប្រើប្រាស់កាមេរ៉ាទូរសព្ទ ជាជាងធ្វើនៅលើកុំព្យូទ័រឬឧបករណ៍ហ្គេម console។ ហើយការត្រួតពិនិត្យអាយុដោយប្រើប្រាស់កាមេរ៉ា ត្រូវបានស្នើរួចហើយ ដើម្បីបញ្ជាក់ពីអាយុរបស់អ្នកប្រើប្រាស់ សម្រាប់ការលក់ផលិតផលអនឡាញសម្រាប់មនុស្សពេញវ័យ៕

ប្រភព: BBC